馬會宿舍設施齊全
香港賽馬會有百多年歷史，由於本身是非謀利機構，所以一直致力慈善活動，各區都有打賽馬會旗號的捐獻機構，不少貧苦大眾受惠於馬會。同時馬會多年來養活了不少員工，給予他們穩定收入之餘，甚至照顧埋員工的家人，好似讀書的書簿費等等，若然讀到書成績理想的話，昔日更會贊助員工的兒女出外升學哩！故此在馬會工作，長久以來都予人一種鐵飯碗的感覺，尤其在1997年未回歸祖國之前，既薪高糧準，又有多項福利，仲要有埋享受無敵靚景的馬會宿舍入住，絕對是羡煞旁人，條件比起不少公務員更優勝。
唔講大家唔知，坐立在馬房旁邊的馬會宿舍，雖然只得四幢而已（未計副練宿舍的一幢），每幢十九層高，每層八個單位，入住的人不算太多，但宿舍之內設有不少康樂設施，除了小型遊樂場、足球場及籃球場外，又有圖書館、茶餐廳、士多、報紙檔，生果店、影視店及剪髮舖等等；最搞笑仲係有一所聯誼會，給予員工在內打麻雀耍樂，尚有已被遺忘的少年警訊，昔日曾在宿舍之內設有會址，當時有不少員工的仔女成為少年警訊的一員，長期在會內的乒乓波上較量。
页:
[1]