曼聯愛天鵝Encore半場和
周日晚另一場英超，由「天鵝」史雲斯主場硬撼曼聯。曼聯連續4仗聯賽不勝之餘，更合共只入1球，今仗仲有主帥莫連奴被罰停賽，相信唔係咁易贏波。至於史雲斯雖然要搶分護級，但球隊近況麻麻，今仗應該都係先做好防務，而且雙方近6次交手有5次開出「半和」，今仗一於推介半場和。（Now 623及LeSportsHK應用程式周日晚11時直播）
腳頭無靈傷停滿營
紅魔已經連續4場聯賽未贏過，上周中歐霸盃作客費倫巴治亦輸波，就算主帥莫連奴順應民意，將狀態低迷嘅隊長朗尼貶為後備，但王牌射手伊巴謙莫域連續5仗聯賽冇入波，前線攻力認真麻麻。曼聯今仗除咗右閘路爾斯華倫西亞同中場大將保羅普巴受傷唔出得外，中場安達靴里拉要停賽，令球隊攻守都有可能出現問題。更重要係主帥莫連奴亦被罰唔可以坐喺後備席指揮，相信對球隊臨場調動同戰術運用都有好大影響。
史雲斯上仗作客史篤城落敗，球隊現時排喺尾2，為搶分護級更加要加強防守。不過，史雲斯近6次對曼聯贏咗4次，有啲「格食格」嘅味道，當中仲有5次開出半場和。況且曼聯前鋒近期腳頭無靈，開賽初段相信好難咬得入刻意死守嘅「天鵝」，今仗一於捧有2.25倍嘅半場和。
页:
[1]