熱刺着火追打大黃蜂
元旦日晚英超頭場爆發另一場倫敦打吡，由熱刺作客硬撼「大黃蜂」屈福特。熱刺一向係聖誕新年快車高手，單計今季頭2輪快車賽期贏晒，況且佢哋近年食住「大黃蜂」，就算客場出擊都冇有怕，客勝有計。(Now 621及LeSports HK應用程式周日晚9時30分直播)
熱刺自從由普捷天奴於2014年接手後，深明聖誕新年快車檔期堅難捱，因此會作出合適輪換，保證球員有足夠體力應付呢個頻密賽程。過去2季熱刺喺呢段期間一共出戰8仗聯賽，取得6勝2和佳績，非常醒神，今季聖誕新年快車首仗先喺主場反勝般尼2比1，上仗作客修咸頓又大勝4比1，進攻中場迪利阿里呢2仗入3粒，弗到漏油，孫興民上仗後備入替都數番1粒，個個咁搶韁，睇得出班波堅有飢渴感。
屈福特遇強即腳軟
屈福特今季每逢遇強即刻腳仔軟，出戰聯賽榜前4名嘅車路士、阿仙奴、利物浦及曼城全部輸晒，明顯唔夠班挑戰前列分子，今輪未開打前熱刺排第5位，論牌面「大黃蜂」自然唔夠揪。加上熱刺近年對屈福特嘅戰績一面倒，聯賽連盃賽在內，熱刺近5次對住「大黃蜂」錄得全勝，擺明格食格，挾住聖誕新年快車特醒往績，今仗可贏波而回。
页:
[1]