馬迪爾為表忠心搏老命 紅魔3M打劫布力般
今晚繼續有英格蘭足總盃16強比賽，衞冕嘅曼聯將作客英冠布力般流浪，晉級可以話冇難度！預計近期大勇嘅「3M」組合米希達利恩、桑馬達同安東尼馬迪爾繼續擔大旗，當中安東尼馬迪爾早前被指已列入「清洗名單」，雖然佢即刻澄清冇咁嘅事，但想證明自己對球隊有建樹，有乜好過入多幾球呢？今仗對弱旅肯定數得就數，推介有1.8倍分頭嘅讓球客勝。（LeSports HK應用程式周一凌晨零時15分直播)上屆足總盃盟主曼聯勝在好手眾多，上圈半力出擊下，都憑住費蘭尼、基斯史摩寧、米希達利恩同舒韋恩史迪加入波，主場輕鬆大炒韋根4粒晉級！今晚嚟到16強作客對住實力麻麻嘅布力般流浪，自然睇高一線。
人多勢眾4線出擊冇有怕
雖然2月份魔鬼賽程令曼聯「有氣無碇唞」，4線出擊要同時應付英超、聯賽盃、足總盃同歐霸，不過上面提過佢哋勝在人多，加上領隊莫連奴擔心班球員頂唔順，一早計劃減少操練，希望盡量保留體力應付比賽。而球隊表現亦無令人失望，除聯賽盃殺入決賽外，聯賽同歐霸亦節節勝利，近5仗錄得4勝，憑住呢股「魔性」，區區布力般又點頂得住！
今季曼聯聯賽成績未如外間般預期，故不時傳出領隊莫連奴想「清洗」，其中安東尼馬迪爾最近就「榜上有名」，仲話巴黎聖日耳門亦有意將佢帶返法甲，講到似層層，馬迪爾早前喺個人網站澄清無意離隊，仲叫大家唔好信啲失實報道，現階段會一心為紅魔爭勝咁話！今晚遇上布力般流浪有機會擔正，仲唔入多幾粒搏好感咩？
至於主隊布力般流浪，自從喺2012年降到英冠作賽之後，咁多年都爬唔番上嚟英超，今季佢哋仲大鑊，現時只係排英冠第23位，深陷降班危機。與其主場同曼聯搏老命，倒不如留番啖氣護級好過。既然紅魔決心咁強，對手更有後顧，讓球客勝係信心之選！
页:
[1]