唞一期再派馬上陣 胡森「至」老定

猪拉多纳

　　啱啱禮拜三，吳定強馬房大發神威，一晚贏兩場，累積10場頭馬，唔使再包尾，一腳踢胡森落榜尾，而胡森係目前咁多位練馬師之中，唯一一位頭馬數字未達雙位數，手上只得9場咁大把。

　　目前胡森仲差六場頭馬至「上岸」，但係佢仲鬼咁老定，剛周三谷戰直情連名都費事報，唔知仲以為有大把時間畀佢慢慢玩，查實馬季得番個零月就歇暑，睇佢咁定，一係早已立心放棄，一係就成竹在胸，驚都未驚過。如果屬後者，今次佢派得上陣嘅馬就要留意，尤其是「紅褲仔」同「至勝威龍」呢兩匹王牌馬，梗係攞分籌碼。

　　紅褲仔降溫應振作

　　第三場「紅褲仔」，前幾場在泥地短途跑得好好哋，上場因為跑濕慢泥途中畀泥頭打中而唔願跑，先至輸成條街返嚟，咁短時間再跑，如果跑番好泥有機會重新振作，尤其係今次賠率冷番啲。

　　第四場「至勝威龍」，出道時已即刻兩W，隔咗好耐至識再贏，唔知中間發生過咩事，總之好馬回復本來面目啦，以佢上場贏馬嗰種輕易法，再在四班跑，邊會有對手頂得住。