尹戈爾入魔前食瓜省招牌

猪拉多纳

尹Sir入魔前騷哥利！原本有傳荷蘭主帥尹戈爾於英國時間周五前落實下季執教曼聯，不過《英國曼徹斯特晚報》爆料，話尹Sir要求踢埋喺今仗對厄瓜多爾嘅熱身賽，下周先正式公布入主紅魔，尹帥表示：「我喺球圈做咗40年，3個月後就滿63歲，我能夠應付各種情況，因為球隊嘅訓練、戰術會議及對征戰世盃嘅激情，你必須保持專注。」講到咁樣，即係主場與厄瓜多爾拍跳唔會揸流攤嘞！
藉機用新丁睇辦

由於荷蘭公布咗30人初選名單，而洛賓及雲達華治仍未歸隊，尹帥一定借呢場波試新仔，剔走7個落實23人決選名單，特別係中場悍將史杜特文重傷冇份，正好畀佐迪卡斯、利萊費亞、約拿芬迪根斯文博上位機會，佢哋實搏甩髀，咁啱厄瓜多爾隊長路爾斯華倫西亞有傷上陣成疑，尹戈爾仲唔趁機贏番場好好睇睇，為接手曼聯前省靚招牌咩。

（中央5台周日凌晨2時30分直播）