多蒙特強勢o趙拜仁

猪拉多纳

德國盃決賽羅拔仔告別戰

「羅拔仔」搶盃告別！今晚好戲連場，唔止有英總決賽同西甲煞科爭霸戰，仲有由德甲兩大班霸多蒙特同拜仁慕尼黑合演嘅德國盃決賽添！呢場波嘅焦點，當然係來季轉投拜仁嘅羅拔利雲度夫斯基啦，佢今晚最後一次為多蒙特披甲，點都想留個美好回憶畀一直撐佢嘅粉絲，撐2.58倍多蒙特冠軍啦！

（無線翡翠台周日凌晨2:00直播）

最初羅拔利雲度夫斯基喺季中落實過檔拜仁嗰陣，小妹都擔心佢未必會再為「蜜蜂」搏老命，不過呢位波蘭射手並冇「揸流攤」，每次落場都搏到盡，最後仲以20個入球成為德甲神射手添！一班曾經視「羅拔仔」為叛徒嘅蜜蜂粉絲都深受感動，喺最後一仗主場聯賽為佢送行，搞到佢眼濕濕，為咗報答球迷，佢賽前更拍心口保證會付出100%努力砌拜仁：「我唔會諗未來東家嘅事，只係想喺離開前捧盃！」
拜仁封王後跌Watt

多蒙特今季飽受傷兵問題困擾，最終仍能以德甲第二名衝過終點，除咗「羅拔仔」大勇，星級中場馬高列奧斯亦功不可沒，佢今季嘅士哥只係比「羅拔仔」少4球，助攻更有13次咁多，把握力定創造力都係一流，唔怪得高普都「貼」列奧斯會做下季德甲神射手啦！咪忘記多蒙特陣中仲有米路斯祖積呢位弗爆小將，絕對可以重溫季初德超盃4:2炒拜仁嘅好夢o架。

無可否認，拜仁喺人腳上一定比多蒙特優勝，不過佢哋自從喺聯賽封王後，就多少有啲唔集中，除咗喺歐聯畀皇馬兩回合「雙殺」，上仗主場亦只係險勝史特加1:0，狀態跌晒Watt。最慘係拜仁近期頻頻失波，近13戰僅得2場保住清白身；難怪名宿碧根鮑華亦承認，拜仁專注力係有所不足，今仗再失一冠絕對唔奇。