諾在其中：相見歡形勢極好

不死鸟

為咗禮拜日越洋轉播新加坡嘅兩場大賽，馬會專登做咗個網頁去介紹呢兩場賽事嘅馬匹，提供更多資訊，用意係好嘅，但係多項資料遲遲都未能上載，眼見新聞稿已經出咗有關排位嘅消息一日，第二朝馬會網頁亦已經有得睇，但係呢個網頁上嘅資料仲未更新，禮拜日賽事就舉行，花咗咁多人力物力，而網頁可能只係用得三、四日，轉播賽過後呢個網頁已經冇用，資料仲要上載得得咁慢，其他的排位表、賠率同分析等資料，亦都係慢馬會網頁一步，搞咁多嘢真係意義不大。

　　心水馬有第六場四班千四米嘅「歡心」，呢匹馬上場初出跑同程，一出閘就領放，步速都唔慢，末段仍能保持走勢跑第三，熱過身之後今場表現應該更佳，韋達復出當然攞番嚟騎，睇嚟佢可以一復出就有馬贏。

　　另一心水馬第八場三班一千米嘅「相見歡」，至今三仗都係一千米直路賽，唔贏都有位置，演出好準，上場出閘慢，亦只係以四分三馬位僅僅輸畀隻「喜萬家」，今場喺三班負輕磅，抽得有利嘅十二檔，相信貼欄更加好跑，上場奪冠嘅「喜萬家」今場要負重磅，另一隻實力馬「天生我財」就抽得一檔，「相見歡」形勢更有利，可贏馬捧盃。