見招拆招：好知己換人有計

不死鸟

勞愛德至今只贏得三場頭馬，名氣與成績似乎不成比例。不過，睇番勞愛德嘅坐騎，實力普遍都係中下貨色，交唔出好成績亦唔能夠完全歸究於佢。其實以此君騎功，只要有多啲實力坐騎，應該好快可以重踏正軌。

　　第九場三班千八米日本中央競馬會錦標，「好知己」近兩仗出爭一班及級際賽，面對一眾強手下落敗不能作準。取得兩場敗績之後，今仗回到三班賽上陣，對手實力可謂大幅減弱，雖然同場亦有不少質新分子如「至勇威龍」、「家家興旺」等，但「好知己」實力絕非三班可留，蔡約翰突然安排勞愛德替此駒操刀，已露出搏殺之意，有力捧盃。

　　第十場二班千六米，「心福」前仗在蔡明紹胯下勝出同程，今仗負磅雖然比該役重十磅，但六歲馬經一仗回氣後，體力應該已經恢復，加上關係密切嘅「雙辣」亦安排響同日第二場上陣，更凸顯出搏殺意圖。

　　同場對手各有缺點，反而「心福」季內拼搏不多，兼且路有專長，重開勝門絕不出奇，可以捧場。