緊湊有餘士哥唔會多

猪拉多纳

今屆歐聯終於嚟到終極決戰，由馬德里雙雄爭逐錦標。細鬼都做過球員，嚟到決賽咁關鍵時刻，成季嘅努力好可能因為喺呢場表現失準而付諸東流，賽前難免好大壓力，細鬼嘅心得係不妨做足熱身，出咗一身汗，會令自己成個鬆晒，加上在場球迷嘅吶喊助威，緊張嘅心情會慢慢轉化為興奮，自然打出應有水準。
「床單兵團」更加保守

老實講細鬼幾鍾意馬體會，雖然呢班波球星欠奉，但個個都不惜氣力，嚴格執行鐵血主帥施蒙尼嘅逼搶戰術，連贏ＡＣ、巴塞及車仔絕非僥倖，與懷住一圓10冠夢嘅皇馬相比，啱啱奪得聯賽冠軍嘅馬體會可謂毫無壓力，贏嘅可再創高峰，就算輸波都無損今屆嘅輝煌。況且雙方對慣對熟，冇秘密可言，質素較高嘅皇馬一定主動搶攻，反而益咗防守固若金湯、擅踢下風波嘅「床單兵團」，可惜箭頭迪亞高哥斯達受傷，對佢哋打擊極大，勢必踢得更加保守，決賽場合通常緊湊有餘，未必太精彩，勝負難料之下，細鬼預計今仗唔會多士哥。