施蒙尼妙用「翻補胎」

猪拉多纳

歐聯今晚上演終極決賽，由兩支來自馬德里市嘅西甲球隊爭標，亦係繼上屆德甲內訌後，決賽再次上演同室操戈。喺唔少球迷心目中，馬體會喺西甲排位應係皇馬、巴塞之後，不過既然佢哋今季能夠打破兩者多年來喺聯賽嘅壟斷局面，已經充分證明呢班波有料到。

馬體會教練施蒙尼最出色之處係懂得擅用一些具經驗、卻未到黃昏時期嘅球員，去帶領一班年輕有質素嘅當打球員，成功將新舊融合，就如利用「翻補胎」去令一架汽車加速前進，當中表表者必推中場堤亞高文迪斯。呢名葡萄牙中場早年被車路士放棄，好多人都以為佢高峰已過，不過施蒙尼慧眼識英雄，懂得激發呢類老將僅餘嘅熱血及雄心，以蔗渣價錢踢出鮑魚味道。經過今個非凡球季，施蒙尼已經充分證明領軍實力，可以預期未來將會吸引更多大球會斟介，無論馬體會捧盃與否，施蒙尼同一眾球員都係大贏家。
小注波膽皇馬「2:1」

力爭第十次捧盃嘅皇馬實力無可否認係高馬體會一籌，球隊季尾聯賽爭標失利，亦有利球員養精蓄銳。睇盤口皇馬只係小讓平半，明顯莊家都唔敢睇小馬體會，我覺得皇馬可憑較佳經驗及質素捧盃，但今場始終係一場過，任何事情都可以發生，而且兩軍都有唔少國腳級人馬，眼見烏拉圭前鋒蘇亞雷斯剛不幸受傷，隨時無緣巴西世界盃，唔排除亦會有保留，亦令今場變數多咗，Peter認為今場並非重錘好時機，只可小注怡情，建議敲皇馬勝「2:1」波膽。
金句：剛剛遇着啱啱，皇馬巧遇馬體