藍武士Ready!

猪拉多纳

揀好冧巴 練定451 壯行大會…

鹿兒島集訓營放煙花、波衫冧巴公布、7,300名Fans參加壯行會……日本世盃大軍經過連串造勢活動，已經為決賽周準備就緒，今晚佢哋响埼玉同塞浦路斯拍跳，就係為咗驗證前期集訓苦練嘅「4-5-1」陣式，呢勻塞浦路斯有難嘞！

（開賽時間：周二晚6:30）

日本國內呢期好多「W杯應援」活動，寄打氣信、神社祈福之類，多到無日無之，日本隊早前响鹿島市指宿市集訓嗰陣，酒店有一晚專登發放咗75枚煙花，為佢哋打氣，前晚又响東京搞壯行會，好多球迷都希望「藍武士」今次能夠「目指頂點」。

想爭標？似乎大想頭咗啲嘞。但日本呢期集訓真係好搏，運動強度大，連長谷部誠都嗌難頂，酒井高德右膝仲傷咗，一度傳出要搵駒野友一代替佢添，好彩檢驗後證實只係發炎，問題唔大。
今鬥塞浦路斯 柿谷踢單箭頭

「藍武士」呢期除咗谷體能，最重要係練「4-5-1」陣式，令人比較意外嘅係用杮谷曜一郎打One Top，「4仔」本田圭佑做影子前鋒，反而創咗德甲日本球員入球紀錄嘅岡崎慎司，雖然着件9號，但就走咗去做右中場，同左邊嘅10號仔香川真司互相呼應。咁嘅布局好唔好冇人知，但就肯定係日本近屆世盃攻擊力最強嘅一隊，連阿爾巴尼亞都贏唔到嘅塞浦路斯，今晚遇着佢哋真係大鑊，日本讓兩球都要2.05倍「讓球主勝」。
大久保揀13號紀念老竇

講開波衫冧巴，日本班國腳都係按慣例同個人喜好揀號碼，唯獨前鋒老將大久保嘉人就特別啲，佢冇用番上屆件16號，反而着起13號，唔通想用「13不祥」邪邪佢？原來除咗佢舊年喺川崎着13號波衫做咗日職神射手比較老利，佢阿媽千里話大久保爸爸克博响舊年5月去世嘅時間，就係下午13點33分，雖然只係巧合，但係大久保就好鍾意呢個冧巴，似乎係用嚟紀念爸爸嘅，真係孝子一名。