四大天王氹Fans 南韓主W博得過

猪拉多纳

出發前最後一場主場熱身賽，唔到南韓唔搏！今晚佢哋出齊「四大天王」，喺首爾世界盃體育場迎戰突尼西亞，可以睇高半線，1.47倍主W不妨一試。

（開賽時間：周三晚7:00）

早喺呢個月12號已經展開集訓嘅南韓，最近終於齊人，呢排佢哋狂練衝刺同戰術，傷兵寄誠庸、朴主永同具滋哲都好番晒，今晚除咗後衞金珍洙、尹錫榮仲要抖吓，原則上可以排出最強陣容，希望喺自家Fans面前贏番場，先至開開心心咁响星期五出發去邁阿密，進行第二階段集訓。
防守未算好 朴主永狀態沉

今屆嘅「太極虎」平均年齡只得25.9歲，係歷代南韓世盃大軍最年輕嘅一隊，幾位前任國家隊主帥好似李會澤、許丁茂、車範根、金正男、金皓同趙廣來曾經碰面研究今屆嘅國腳，得出結論係中前場唔錯，尤其孫弘民、李青龍、寄誠庸同具滋哲呢個「四大天王」組合，國際賽經驗豐富，可以話係「歷代最強」嘅中場，唯獨隊波轉攻為守仍嫌太慢，後防仲有改善空間。

其實南韓早就度定踢「4-2-3-1」陣式，應付決賽周，中場確實問題唔大，就係前線未臻完美。例如前鋒朴主永近兩年响英國坐多過踢，隻腳又因為蜂窩組織炎做過小手術，剛啱先至好番，狀態成疑問，雖則仲有李根鎬、金信旭同金甫炅可以用得，但佢哋始終唔係世界級前鋒。
突尼西亞外流國腳歸隊

由於突尼西亞今次都Call咗幾件外流國腳歸隊，體能同速度同南韓有得鍊，除非朴主永突然踢番全盛時期嘅水準，否則「太極虎」想炒起佢哋好難，就咁博個南韓主勝合理啲。