烏拉圭贏北愛兩粒好正路

猪拉多纳

和英格蘭同處死亡D組嘅烏拉圭明早亦有一場主場熱身賽，對手係歐洲弱旅北愛爾蘭，波童相信主隊就算缺少受傷嘅王牌蘇亞雷斯，亦有力大炒對手，捧讓球主勝。

（TVB301周六早上7時30分直播）

烏拉圭為備戰分組賽兩支歐洲球隊英格蘭、意大利，喺決賽周前特別安排咗兩場模擬熱身賽對北愛爾蘭及斯洛文尼亞，以實力計呢兩隊只係歐洲二線尾、三線頭，相信領隊泰巴尼斯咁做係想「由淺入深」，增強球員比賽信心。
冇阿蘇一樣夠殺

前鋒蘇亞雷斯做完半月板手術後，據報最快要分組賽第2輪對英格蘭先可以復出，今仗肯定缺陣，愛斯賓奴前鋒史杜安尼及巴勒莫箭頭艾保靴南迪斯都有機會夥拍卡雲尼或科蘭掛帥。泰巴尼斯遞交最後參賽23人名單前，要喺目前25人中剔走兩個名額，所以今次係球員爭取表現嘅最後機會，落場一定拚盡。

北愛現時世界排名84，實力根本唔入流，陣中只有前紐卡素守衞艾朗曉士、修咸頓中場史提芬戴維斯及打比郡前鋒占美禾特較具名氣，經過舟車勞頓，能否發揮水準頓成疑問，而且佢哋今次只係拍跳角色，落場鬥志同決心一定及不上主隊，烏拉圭淨勝兩粒好正路。