筍盤益你:（斑尼）勇猛神駒穩位望贏

不死鸟

 剛戰韋達停賽復出即贏三場，季內第二十三次做騎師王，計落即平均唔夠三個賽日就封王一次，證明落注嗰陣如唔揀選佢啲馬，贏錢機會的確大打折扣﹔禮拜四韋達唔使講又有成手惡馬，尤其尾三場嘅安廐馬實力唔曳，相信有力延續旺勢。

        睇番周日賽事，排練馬師榜尾二同尾三嘅伍、鄭兩廐都有馬贏，只要佢哋各自贏多一W，就可以成功達到馬會發牌要求，而今次包尾嘅黃汝安亦唔敢托大，三駒均交畀韋達操刀，可見已去到不容再失嘅環境，其中出爭第六場三班一哩嘅「勇猛神駒」，歷來配韋達十五次得四勝三位，當中有三場喺同程贏得，就知呢次報爭強項實砌。可能你會話呢場排九檔形勢麻麻，但其實近兩仗同程排八、七檔下，佢亦交出冠亞各一成績，證明唔算太輸蝕。

        雖然今仗「勇猛神駒」要負一三二磅，但前仗亦試過負一三一磅贏馬，至於對手方面，特擅同程嘅「好兄弟」抽排十一檔，「駿馬大師」近績只係麻麻，「金獅勇將」、「緣是燦爛」韋達又唔揀，兼且「神駒」系馬主鬥志鮮明，估計三甲一席好穩陣。

洛辛堡作客照捧

        老牌挪威班霸洛辛堡今季終於復甦，季內九場聯賽錄得五勝四和佳績，上仗若非有球員擺烏龍射入自己龍門，未必喺主場同對手打成二比二。今晚作客辛迪夫佐特，計實力隨時即時反彈全取三分。

        咪睇辛迪夫佐特依家以十五分排第四，僅落後榜首洛辛堡四分，但其實近兩次喺主場同後者交手全輸，而且每次上半場已輸波，捉路今次一於博半場主客和嘅客勝。