荷蘭加納喪攻「大」鬥法

猪拉多纳

世盃殺到埋身，列強密密踢熱身賽操弗狀態，大家咪錯過睇辦機會喇！今晚傳統足球強國荷蘭會喺主場鬥加納，「橙軍」主帥尹戈爾嘅戰術理念係攻、狂攻同喪攻，睇埋對家加納，一樣係攻強守弱之輩，咁嘅環境，梗係捧1.78倍「入球大」啦！

（now632台及TVB13周日凌晨2:30直播）
尹佩斯擔正騷哥利

冇錯，荷蘭今仗冇咗中場指揮官雲達華治，不過呢位漢堡隊長今季傷患甚多、冇咩貨交，況且「橙軍」另一件中場大將史奈達，今季喺土超豪門加拉塔沙雷表現唔錯，雲達華治退隊，根本冇想像中咁大影響囉！

據講為咗盡快操弗傷愈嘅射手尹佩斯，尹戈爾打算畀呢位曼聯前鋒繼續擔正。為國家隊又好，為下季球會前途又好，尹佩斯都肯定搏盡，騷哥利畀「新魔頭」尹戈爾睇！有佢配合洛賓同史奈達，鋒力當然勁到得人驚，只可惜望住荷蘭條後防線堅唔開胃，大部分都係荷甲二打六，右閘真馬特又話倦勤，想零封對手談何容易吖。
加納鋒線多猛將

加納領隊艾卡華斯艾比亞尋日公布世盃23人大軍名單，前鋒基恩、中場卡華禾艾沙姆、奇雲保定、蒙達利等猛將悉數入選，中前場星味十足，但弊在條防線同荷蘭一樣，冇人孭飛，點信得過先？既然兩軍都攻強守弱，「士哥」又點會少呀？