葡萄牙打「臘」撐讓主

猪拉多纳

10年前葡萄牙喺自己地頭0:1輸畀希臘，同歐國盃冠軍擦身而過。呢兩支決賽周分子今晚喺里斯本拍跳，適逢今年係葡國足總成立百周年，以C朗為首嘅葡萄牙戰將，為面子當然唔衰得，捧2.48倍「讓主」！

（廣東體育周日凌晨2:30直播）
贏波賀足總百周年

今仗喺里斯本國家運動場舉行，近3.9萬張波飛去到前日已賣咗9成，咁多人想睇無他嘅，畢竟今年係葡萄牙足總百周年慶典，咁特別嘅日子梗有收視啦！況且希臘係葡萄牙仇家，葡國球迷肯定想班球員加多兩錢肉緊，報番04歐國盃之仇。應屆金球獎得主、啱啱協助皇馬勇奪歐聯嘅C朗，前日已經聯同兩名「艦隊」戰友法比奧干查奧、比比歸隊，同魯爾梅利斯、拿尼等戰將齊齊投入操練，預期就算今場係熱身賽，葡萄牙都唔會喺足總100歲「牛一」呢個咁具紀念性嘅日子交行貨。

對家希臘仲係靠緊37歲隊長加拉高尼斯、34歲中場加素蘭尼斯孭飛，證明冇乜後起之秀。況且希臘近年人氣最強嘅射手美度古，自從年頭過檔英超加盟富咸之後一直踢唔起狀態，咁嘅人腳邊夠葡萄牙鍊呀？