日本人乾熱身賽獻細

猪拉多纳

鬥哥斯達黎加前曬餐飽

轉移到美國集訓嘅日本，呢輪都進行緊抗酷暑訓練，班人曬到乾乾哋，今日喺佛羅里達坦帕嘅雷文．占士球場同哥斯達黎加拍跳，想唔開1.54倍入球細都難。

（開賽時間：周二早上9:00）

日本响出發前主場友賽塞浦路斯，只係1球險勝，表現好難令Fans滿意，當時香川真司就解釋，因為鹿兒島嘅第一階段集訓主要谷體能，搞到成班人疲晒，佢仲以自己為例，話喺曼聯打正選嘅波，平均每場會跑動11至12公里，但係嗰場練習賽佢只跑咗8至9公里咁上下，出少咗3成力都有，又有乜辦法踢得好先。
香川攰到跑唔郁

咁今日又點呢？「藍武士」到咗美國之後，一直揀至熱嘅時間練波，好似尋日又頂住30度高溫同60度濕度，喺度蒸足兩粒鐘，班人啲脂肪應該冇乜剩，不過成班「人乾」亦都未必跑得郁，想炒排名高13位嘅哥斯達黎加絕對係妄想。

由外流球員主打嘅哥斯達黎加，有効力荷甲燕豪芬嘅前鋒拜仁雷斯，同埋德甲緬恩斯嘅後衞祖利亞戴亞斯呢類勁嘢，响中北美洲屬於強隊，但係呢班波節奏比較慢，啱晒謝謝哋嘅日本行住嚟踢。何況日本已經全軍坐定定欣賞過哥斯達黎加嘅打波錄影，知道晒對手嘅窿路，就算贏唔到都冇咁易失波，梗係玩入球細啦。