追墨西哥半場和

猪拉多纳

免添傷兵 應酬「波」唔會搏

巴西嘅同組對手墨西哥上場熱身賽慘勝厄瓜多爾，隊長馬基斯受傷，中場蒙特斯更係斷腳收場。「仙人掌兵團」噩耗連連，世盃未開幕就整傷兩件主將，隊內士氣定受影響，聽朝呢班墨國哀兵再踢熱身賽，飛去美國芝加哥對戰波斯尼亞，墨軍或會踢得穩穩陣陣，費事再添傷兵，兩隊對上兩次都開出半場和，一於再追！

（中央5台周三早上9時30分直播）

喺近兩場熱身賽見到墨西哥其實狀態幾好，先以3比0大勝以色列，上仗亦以3比1贏厄瓜多爾，但過程慘烈，幫墨軍轟入靚波嘅中場大腦蒙特斯畀對手撞到斷腳，肯定緣盡世盃，而老將馬基斯其後亦告受傷，雖然傷勢無大礙，不過今場對波斯尼亞馬基斯應會缺陣。熱身賽變成「傷身賽」，「仙人掌兵團」今場對波斯尼亞好難唔存在心理陰影，戰意成疑，今場或會先穩住陣腳，無謂「自殘」。
波斯尼亞收起主力

波斯尼亞上場熱身賽贏科特迪瓦2比1，迪斯高、比真歷、米斯莫域、比高域等主力都有正選披甲，不過世盃臨近，為穩陣起見，主帥蘇錫今場或會多派副選列陣，以免踢殘班主力，但波軍副選同正選實力有頗大距離，難以喺上半場同墨軍分出勝負，而且雙方近兩次均開半場和，半和捧得過！