全細界（目及）到實

猪拉多纳

蠱惑「超霸鷹」鬥希臘

上周中國際熱身賽「超霸鷹」尼日利亞對蘇格蘭嘅假波疑雲，搞到滿城風雨，無論賽前賽後都話題不絕，眾矢之的嘅尼日利亞再次出擊，今晚喺美國中立場同歐洲球隊希臘拍跳，上屆於世盃分組賽兩隊碰頭時尼軍亦疑似造假，又睇吓「超霸鷹」喺眾人（目及）實之下敢唔敢再出蠱惑？

（周三早上7時開賽）
造假醜聞愈揭愈誇張

非洲波一向蠱惑多，尼日利亞可謂當中嘅「表表者」，上周中熱身賽對蘇格蘭開波前，英國國家重案署（NCA）收到風指佢哋可能涉嫌打假波，並展開調查，點知比賽期間尼軍門將伊積迪仲唔識死，明明接實個波，點知佢竟將個波撥入自己龍門，雖然球證因有蘇軍球員撞到伊積迪而判入球無效，但佢呢個「離奇發力」嘅撥波動作，於慢鏡頭下無所遁形。

之後尼軍假波醜聞愈爆愈多，今年4月有記者放蛇，與自稱係前球員嘅尼日利亞足球中介人奧科羅基接觸，奧科羅基話只要有錢，就可以安排「超霸鷹」球員於今屆世盃打假波，列出輸12碼至少要10萬歐元（約105萬港元）嘅價錢牌，佢仲話某位知名尼軍國腳願意造假，據報嗰位國腳有份出戰對蘇格蘭嘅熱身賽添，如果屬實都真係相當誇張。至於曾獲奧科羅基邀請會面嘅尼日利亞國腳奧根耶奧拿斯，亦喺twitter解釋當知道佢哋係為打假波而來，即刻說不兼走人。
上屆決賽周早有景轟

尼日利亞有唔少前科，今年4月有新加坡賭波集團成員爆料，指該隊與洪都拉斯通過幕後操控幫助，取得上屆南非世盃入場券，而嗰屆分組賽亦疑似造假，喺有人交足戲領紅被逐下，輸畀今仗對手希臘。

希臘日前於熱身賽同葡萄牙互交白卷，主力中堅「PaPa」柏柏斯達夫普路斯仲喺臨完半場受傷離場，據報呢位多蒙特後衞要抖7日，今仗會掛免戰牌。老實講，一隊蠱蠱惑惑，一隊驚傷唔敢太搏，實在勝負難料，轉玩入球細更實際。