墨西哥演入波大騷

猪拉多纳

四大箭頭個個堅

墨西哥同波斯尼亞兩路世盃大軍，聽朝會師美國芝加哥進行熱身賽。墨西哥對上兩場友賽贏到開巷，今場擁有半個主場之利，本來值得睇高一線，不過缺少咗防線領袖馬基斯，防守隨時出現漏洞，之但係波斯尼亞亦有兩大守將受傷避戰，兩軍射手鬥騷哥利，捧2.02倍入球大最划算！

（開賽時間：周三早上9:30）

墨西哥早前落實最終大軍名單後，連贏兩場熱身賽，分別以3:0大炒以色列及3:1撼低厄瓜多爾，睇得出班國腳嘅狀態同士氣都一流。雖則上場鬥厄瓜多爾，中場路爾斯蒙迪斯勇戰受傷被迫退隊，主帥米基爾靴里拉承認對球員造成影響：「呢個係艱難時刻，我會盡快調整球隊嘅心理狀況，搵個時間同佢哋好好傾吓。」但老實講吖，同一位置有馬高法比安呢名進攻多面手頂替，中前場組織串連根本唔成問題。
馬基斯缺陣後防有隱憂

更何況「小豌豆」查維亞靴南迪斯同魯爾占美尼斯兩名箭頭，仲要同奧利比柏拉達及杜斯山度士爭逐前線正選席位，今場遇着有隊長兼中堅史柏希斯，同埋左閘哥拉辛拿斯受傷預計避戰嘅波斯尼亞，上述四大墨西哥射手無論邊個落到場，都必定自動波去盡，所以入波點會少呀！

「仙人掌軍團」進攻火力夠保證，但後防守唔守得住就難講咯。事關防線精神領袖馬基斯受傷缺陣，佢哋冇咗呢名國際賽經驗豐富嘅中堅壓場，班後防球員隨時自亂陣腳，對住迪斯高同伊比斯域兩名波斯尼亞強勁前鋒嘅進襲，要保持清白之身睇怕唔易。既然兩軍今場都有前冇後，梗係捧「大」等睇入球騷！