意大利Hea鬥盧森堡小勝收工

猪拉多纳

意大利痛失中場大將蒙杜利禾之後，今晚主場同盧森堡熱身賽，無論領隊柏蘭迪利或球員都難免有所顧忌，比賽時應會就住踢，以免再添傷兵。幸好對手只係世界排名112位嘅「魚腩球隊」盧森堡，預料呢支06年世盃盟主會Hea住嚟踢，點到即止，小勝居多，主W冇肉食，建議揀入球細。

（周四凌晨2時45分開賽）

柏蘭迪利已揀定23人名單，如果再有球員受傷就要補選，一來打亂部署，二來重召之前被剔除嘅球員，對方條氣未必順，整體實力受削之餘，亦會影響隊內氣氛。因此現時最緊要保持球員身體健康，贏唔贏到熱身賽只屬其次。事實上，意大利一向都唔重視熱身賽，上仗被愛爾蘭攻到氣咳，結果好彩地打和0比0，因此雖然盧森堡係魚腩，但唔好期望意軍會去盡大炒對手。
恩莫比尼2億投多蒙特

值得一提，意大利前鋒巴洛迪利有傷在身，應會繼續避戰，另一位射手恩莫比尼前日飛去德國處理轉會事宜，唔多唔少會分心，佢最終落實以1,850萬歐元（約2億港元）轉會費，由拖連奴轉投多蒙特，簽約5年。其餘3位入選嘅前鋒卡斯辛奴、阿利斯奧施斯、恩斯治尼都非正宗箭頭，意軍鋒線數胡能力成疑，揀細最正路。