列基林拔當「紅」必搏 三獅副選搶錢搶W

猪拉多纳

夢幻一周降臨，列基林拔要做「英」雄！英格蘭今晚喺美國邁阿密同厄瓜多爾拍跳，主帥鶴臣講明試陣，派遣上仗鬥秘魯踢後備嘅球員擔正，即係話啱啱加盟利物浦嘅列基林拔大有機會踢正選。回歸愛隊之餘仲做埋國家隊前線話事人，今晚仲唔搵厄瓜多爾祭旗呀！捧2.03倍客勝。（TVB301及廣東體育周四凌晨3:00直播）
鶴臣試陣 史達寧 勞基梳爾孭飛

年屆32歲嘅列基林拔，前晚終落實加盟利物浦簽約兩年，回歸兒時愛隊已經吐氣揚眉，最重要係連鶴臣都睇佢台戲，講明會派遣呢位新「紅軍」擔正。適逢朗尼上仗為「三獅兵團」鬥秘魯場波踢到一無是處，如果列基林拔今晚做到嘢，要喺決賽周擔正絕對唔係天方夜譚。

英格蘭大軍禮拜二抵達邁阿密，由於當地中午氣溫有成30度，濕度仲去到百分之七十三，大軍到埗後鶴臣只要求佢哋拉吓筋同散步，慢慢適應天氣。呢位主帥仲話，會把握機會喺今場波試陣，除咗列基林拔外，好似史達寧同勞基梳爾等喺對秘魯一戰做後備嘅球員都會擔正，呢班二線兵為博表現，落到場隨時搏命過班主力，鬥心唔使懷疑。
厄瓜多爾失王牌 死氣沉沉

由於邁阿密冇正規足球場，所以今場波會喺NFL球隊海豚嘅Sun Life球場舉行，不過呢場波喺邊度踢，相信厄瓜多爾都惡唔出樣。呢支世盃E組分子上場熱身賽輸畀墨西哥1:3，表現曳唔在講，最大鑊係好波之人沙根度卡斯迪路勇戰，右膝重創，今日要再做多次磁力共振檢查，極可能緣盡世盃，中場卡路士古路素都認冇咗呢位希拉爾球星壓陣，大軍戰鬥力肯定大打折扣，成班波士氣低沉，邊夠一班等住上位嘅「副選三獅」鍊吖！
Data King：英格蘭半場7連細

雙方過去2次交手英格蘭分別贏1:0、2:0。

英格蘭近7場比賽全部開半場細。

厄瓜多爾最近4場國際賽場場有失波。
乜都玩錦囊：「三獅」要磨合「和客」玩得過

「三獅」主帥鶴臣講明今仗試陣，球員肯定要時間磨合，開賽初段唔易咬得入厄瓜多爾，估計英格蘭要到下半場先攞到甜頭，半全場4.9倍「和客」玩得過。