阿根廷主場立威搵「里」祭旗

猪拉多纳

阿根廷剔除班尼加、荷西蘇沙同奧達文迪後，23人世盃大軍名單塵埃落定，備戰工作亦步入最後階段。阿根廷聽朝熱身賽搵嚟弱旅千里達拍跳，用意相當明顯，就係搵對手祭旗振聲威，讓2球亦照捧1.57倍「讓球主勝」！

（TVB301周四早上6:30直播）

阿根廷主場威力唔嘢小，最近嗰場以3:1擊敗秘魯不特止，之前鬥智利、烏拉圭同厄瓜多爾等南美洲勁敵都最少贏3粒，今場對手只屬「魚腩」千里達，啱啱完成世盃點兵嘅主帥沙比拿點會失威。連埋前日26歲「牛一」嘅阿古路在內，美斯、希古恩、拿維斯同柏拉斯奧5大箭頭全部候命搏殺，為博取沙比拿歡心，落到場肯定撳住千里達嚟搶，要大勝可以話冇難度。

千里達未夠班
後防大將私事退隊

至於近5場熱身賽未輸過嘅千里達，戰績睇落標青，但值得留意對手只係阿聯酋、新西蘭、牙買加之流，同今場作客阿根廷根本唔能夠相提並論。千里達領隊史堤芬赫特賽前點名盛讚祖雲鍾斯、古艾拿等幾名土炮潛質優厚，但佢都承認呢班國家隊未來棟樑嘅集中力同足球意識有待磨練，換句話講，即係家陣未夠班囉！更何況後防大將卡路士艾華斯因私人理由退隊，嚴重削弱防線實力，莫講話難靠前鋒堅韋尼鍾斯單天保至尊，真係輸少球都已經偷笑。