西軍考察傷兵半場唔夠薩

猪拉多纳

上屆世盃盟主西班牙出征巴西前最後一擊，今晚於美國中立場搵咗薩爾瓦多拍跳。西班牙主帥迪保斯基講到明，今仗會考察迪亞高哥斯達等傷兵，恐怕佢哋未有咁快上力，況且「鬥牛士」有閒情買內衣氹另一半，擺明冇將心思放喺場波度喇，薩爾瓦多初段有力頂住唔輸，半場和有買趁早。

（now 632及TVB 13周日凌晨4時直播）
眾將猛shopping唔專心

西班牙已經確定23人大軍名單，包括喺歐聯決賽受傷嘅馬體會球員迪亞高哥斯達及桑法蘭托里斯，賽前領隊迪保斯基表示：「迪亞高哥斯達同桑法蘭托里斯將會喺今仗上陣，藉此考察佢哋嘅傷勢恢復到乜嘢進度，我希望會畀到個滿意答案。」不過斯維覺得就算兩人啱啱好番都唔慌有態，佢哋心急爭取表現，隨時愈急愈亂冇貨交。同時有記者影到西班牙型男中堅沙治奧拉莫斯，去咗華盛頓一間女性內衣店閒逛，「沙拉」對T-back情有獨鍾，見佢拎起啲黃色同白色T-back左揀右揀，似乎係為索爆女友比娜揀禮物畀個驚喜佢喎，至於隊友連拿、恩尼斯達、布斯基斯及柏度洛迪古斯亦唔執輸，喺嗰度買夠一袋二袋戰利品添，成班「鬥牛士」咁有情趣買嘢氹另一半，唔多將薩爾瓦多放在眼內。
薩爾瓦多有半個主場

睇番「鬥牛國」於熱身賽特別「立油」，無論對勁旅意大利定玻利維亞、南非等弱旅，初段受制於對手密集防守而老鼠拉龜，心態上又唔急於爭勝，三仗上半場均互交白卷，加上今仗派出「迪哥」等狀態未明嘅球員，初段未必咬得入好氣好力、有半個主場之利嘅中北美洲球隊薩爾瓦多，半場和有分頭不妨追多鋪。