南韓 加納唔慌多攻細

猪拉多纳

Hea住等上機去巴西

出發去巴西之前最後一場熱身賽，邊個仲敢冒險？所以南韓今日喺美國邁阿密友賽加納，唔排除兩邊都就住就住，玩1.5倍入球細啱數。

（TVB301周二早上7:00直播）

呢輪南韓响邁阿密操到火紅火綠，除咗針對俄羅斯嘅戰術訓練，就係集中谷體能力量，啲20米衝刺同舉鐵，次數多到數唔清，後衞金英權咁樣解釋：「歐洲球員憑乜贏波，就係力量訓練贏你，呢一點好重要。」
「太極虎」行雷照谷體能

「太極虎」就係咁樣埋頭苦練，練到幾乎唔知冷熱同打風落雨，好似前日咁，訓練場嗰邊突然行雷閃電，佢哋先匿埋一陣，到咗天朗氣清，又衝番出嚟操過，成班人真係好似過住軍訓生活咁。不過天道酬勤，南韓起勢咁谷，班人除咗疲啲，基本上上晒力，連一直有傷嘅中堅洪正好都跟足大隊嘞，呢一刻佢哋可謂Ready晒，唯一要小心只係受傷。
「黑星」防線傷患嚴重

加納嗰邊冇南韓操得咁癲，原因係幾個關鍵位置都有傷兵，其中後防核心艾卡文高足踝有事，上星期三至做完小手術，今晚自然唔使預佢。龍門阿當拿臣隻大髀亦唔多妥，另一件門神達奧達又沉到喊，連加納媒體都認為，「黑星」雖然有艾辛、蒙達利加奇雲保定一條勁爆中場，但係後邊問題多到喊，係今屆世盃嘅最大死穴。

由於大家都就嚟上機去巴西，冇必要搵命博吖，傷咗退出冇人可憐你，呢場波雙方可能似儀仗隊多過球隊，博入球細啦。