小組一二名賠率及推介

猪拉多纳

A組推介：巴西、墨西哥 （2.5倍）

巴西實力超班兼有主場之利，首名資格可謂手到拿來，非洲球隊表現飄忽，喀麥隆伊度奧單天難保至尊。克羅地亞輸蝕之處，就係第一場波就要硬撼巴西，容易開壞個頭，相反墨西哥只要喺喀麥隆身上全取3分，出線路途會較為平坦。
B組推介：西班牙、智利 （3.3倍）

澳洲實力所限，如無意外應該包尾出局。上屆冠軍西班牙實力默契都喺番度，依然係首名出線大熱門。荷蘭後防球員太幼嫩，經驗不足隨時成為致命傷，智利最大隱憂，係主力維達爾經過手術後狀態未必弗，或者會對隊波嘅發揮有影響。
C組推介：哥倫比亞、日本 （4.75倍）

呢組實力最平均。科特迪瓦個人質素唔使懷疑，可惜踢法太重個人主義，隨時畀擅踢整體戰嘅日本及希臘恰死。希臘一向擅守唔擅攻，相比下，以外流歐洲球員為骨幹嘅日本較可取。嚟自南美洲嘅哥倫比亞有半個主場之利，當然有力首名出線。
D組推介：烏拉圭、英格蘭 （5.5倍）

英格蘭以往畀人雷聲大、雨點小嘅感覺，今屆身處死亡之組，反而壓力冇咁大，話唔定有驚喜演出。烏拉圭鋒力強橫，而且佔地利優勢，有力突圍。意大利近年防線嘅穩健性大不如前，而且佢哋向來慢熱，一旦分組賽早段失利，隨時萬劫不復。
E組推介：法國、瑞士 （3.55倍）

98世盃冠軍法國，上屆爆出將帥不和醜聞，今屆重整旗鼓可望爭取首名出線。瑞士由名帥希斯菲特領軍，而且上屆分組賽曾擊敗西班牙，實力不容小覷。厄瓜多爾離開高原主場好難作惡，洪都拉斯明顯係典型嘅陪跑分子。
F組：阿根廷、尼日利亞 （3.05倍）

阿根廷喺呢組一枝獨秀，首名出線毫無懸念，亞洲球隊伊朗實力未夠班，餘下一席為波斯尼亞及尼日利亞之爭。尼日利亞嘅體力型踢法喺濕熱天氣下略微佔優，相反，波斯尼亞首度亮相輸經驗，想出線除非有上佳發揮，否則好易「係咁先」。
G組：德國、葡萄牙 （2.1倍）

德國陣容鼎盛，近年喺大賽嘅表現亦四平八穩，出線問題不大。葡萄牙有應屆國際足協金球獎得主C朗領軍，發揮正常亦有望取得一席出線資格，不過加納、美國絕非善類，就算德、葡順利出線，相信亦需要花一定氣力。
H組：比利時、俄羅斯 （3倍）

新星湧現嘅比利時，被視為今屆世盃一路奇兵，分組賽對手實力一般，預料要去到淘汰賽先會遇上真正考驗。俄羅斯、南韓及阿爾及利亞實力相若，堅難揀，不過俄羅斯身為下屆主辦國，而且主帥卡比路有料到，可秤高半線。