葡萄牙 愛爾蘭吼和

猪拉多纳

C朗未踢得 唔識入波

葡萄牙足總日前向擁躉「報喜」，王牌基斯坦奴朗拿度正式復操，但俗語有云遠水難救近火，葡軍聽朝喺美國新澤西同愛爾蘭拍跳，雖然係佢哋遠征巴西前最後一場熱身賽，將帥為壯行色實冇保留，弊在呢支「一人球隊」今場仲係唔一定有C朗孭飛，根本信唔過；另邊廂嘅愛爾蘭近況唔掂又唔齊腳，同樣缺乏贏波本錢，一於敲3.45倍和波。 （開賽時間：周三早上7:45）

葡萄牙早幾日喺熱身賽硬撼墨西哥，憑中堅般奴艾維斯喺下半場補時頭槌絕殺對手，贏波過程絕對唔夠說服力。擔正數胡嘅箭頭艾達盧比斯，勤力就勤力喇，弊在質素係「有限公司」，頻頻浪費埋門機會。
愛爾蘭近5戰不勝 射手啞火唔識入波

葡萄牙喺換邊後更被墨西哥控制戰局，若非門將伊度亞度撲到「上晒身」，救走幾球必入波，肯定一早已經輸緊幾粒，所以今場未必敢用C朗拿度掛帥嘅葡萄牙，進攻一啲威脅都冇，實在捧唔落手。

雖然葡萄牙冇乜本錢贏波，但愛爾蘭要贏都唔係容易，領隊奧尼爾舊年底接替查帕東尼上任後，除咗頭威頭勢贏過拉脫維亞，隨後5場僅得3和2負劣績，上場友誼賽更喺半場領先兼打多個嘅優勢下，最終畀哥斯達黎加逼和，由此可見呢班波狀態認真一般。

再者羅比堅尼、沙恩朗同奇雲杜里3大箭頭，最近3場加埋入得1球，後防大將奧沙同史密斯高文又冇隨隊前往美國，今場同葡萄牙名副其實係海軍鬥水兵格局，吼實和波啱數。