B組再現天殘腳 荷蘭橙出唔到線！

猪拉多纳

波係圓嘅，喺足球世界入面，咩事都有可能發生。今屆世界盃肯定有好多意想唔到嘅事，我都趁開鑼前夕嚟個大預言先！
1.「冷門」阿根廷捧盃

過去4次由南美洲國家辦嘅決賽周，都係南美球隊威晒，巴西雖佔盡天時地利人和，但始終爭個鎖匙人派牌，球迷嘅動力亦係壓力。相反被睇淡嘅阿根廷輕裝上陣反而可能有驚喜，話唔定美斯養精蓄銳世盃大爆發呢！
2. 荷蘭命喪B組

荷蘭冇埋雲達華治、史奈達狀態成疑，繼續靠尹佩斯同洛賓孭飛？未必掂囉，最弊係後防無大將，分組賽硬撼西班牙難搶分，智利亦唔易啃，荷蘭爭出線亦有隱憂，隨時命喪B組。
3. 賓施馬攞神射手

好多人都會貼C朗、美斯攞神射手，但小弟認為賓施馬亦有力爆出。佢去季為皇馬轟入24球，啱啱法國熱身賽大炒牙買加8粒，賓施馬兩入波、3助攻搶爆鏡，加上法國同組對手弱，實大把機會數胡！
4. 最佳年輕球員葛斯

德國選得高路斯一個正宗前鋒，擅於後上入波嘅馬里奧葛斯嘅作用非常重要，有望繼上兩屆師兄普多斯基同湯馬士梅拿後，成為世盃最佳年輕球員。當然法國嘅保羅普巴、比利時嘅贊奴沙亦值得留意。
5. 天殘腳復仇記

上屆決賽尼祖迪莊一腳踩落沙比阿朗素心口記憶猶新，今屆兩個硬漢喺B組分組賽重遇，期待沙比仔還迪莊一下天殘腳。D組意大利烏拉圭就上演《壞孩子的天空》，由巴洛迪利大戰蘇亞雷斯，肯定好睇過戲！