巴西吞唔晒格仔兵

猪拉多纳

讓得辣 贏3粒至賺到盡

世界盃揭幕戰，A組主辦國巴西迎戰克羅地亞，「森巴兵團」一向屬於捧盃熱門，今屆仲有地利，全人類一致睇好佢哋可以旗開得勝，被唱到熱爆燈，今仗對歐洲二線球隊，都要讓球半、兩球，認真誇張。無可否認巴西贏面大，但冇必要大炒，加上「格仔兵」克羅地亞亦非泛泛之輩，若刻意擺「大巴陣」，「森巴兵團」都會好頭痕，隨時贏波輸盤，從投X角度分析，寧揀客軍下盤。

（無綫翡翠台、明珠台、TVB13、now818及840周五凌晨4時直播）

傳統印象中，巴西攻力強、足球氣氛濃烈，順理成章梗係喪攻對手，爭取大捷獻主場fans。不過時移世易，巴西由「大菲」史高拉利執教下，現實主義掛帥，放棄傳統華麗悅目踢法，取而代之係講求防守，快速反擊，似應季西甲冠軍馬德里體育會風格。「大菲」愛將拉美利斯、荷西保連奴、費蘭甸奴、大衞雷斯全屬打仔格球員，除咗尼馬之外，冇球星可言，難怪畀球王比利形容為史上最強防守嘅巴西，唔好期望每場大炒對手。
克羅地亞防守硬淨

世盃賽程緊密，最緊要識留放，贏波攞齊3分已足夠，以史帥務實作風，相信唔會要求球員浪費體力追求贏得「漂亮」。同埋巴西擁有主場之利，但同時亦承受沉重壓力，特別係國內反世盃浪潮高漲，首仗不容有失，想贏亦唔會太冒進，以免被對手偷襲。

克羅地亞最大隱憂係射手文迪蘇傑停賽，但球隊今仗目標清晰，唔輸已達標，文迪蘇傑缺陣下，或干脆擺「大巴陣」死守。呢支巴爾幹半島勁旅防守穩陣，06年世界盃對巴西，以及兩年前歐國盃對西班牙，同樣僅負0比1，想淨勝佢哋兩球，絕對唔易。中場莫迪歷過去一季被皇馬教練安察洛堤改造成「克國派路」，演出相當出色，佢嘅致命傳送及遠射能力，有力威脅巴西大門。若然捧上盤，巴西贏1球即輸盤，贏兩粒亦只係贏半個盤，要贏3球先至擸晒全個盤，博克羅地亞下盤較划算。
森巴兵 2戰未輸過

巴西同克羅地亞史上曾交過兩次手，巴西取得1勝1和成績，雙方最近一次對碰就係06年德國世盃，同今屆一樣，當時兩軍亦係喺小組嘅首輪中交鋒，當時「森巴兵」憑住卡卡禁區頂一記妙射破網，以1比0擊敗「格仔兵」，最終巴西小組3戰全勝首名出線，而克羅地亞則以2和1負戰績無緣16強。
巴西前鋒 侯克

除咗尼馬之外，巴西另一位最具威脅前鋒應該係「變形俠醫」侯克，呢位大隻佬衝刺力強，兼有不俗腳下工夫，可謂剛柔並濟，當對手掛住盯實尼馬，侯克將有更多搵食機會。
克羅地亞中場 莫迪歷

典型中場指揮官，極富創造能力，屬於球隊進攻大腦。莫迪歷近年更勤操體能，身體對抗性亦明顯提升，上季成功佔據皇馬正選，成為捧歐聯功臣，盡顯功架。
克羅地亞下盤