世盃開波 尼馬入屋Show Off

猪拉多纳

揭幕戰 巴西Vs克羅地亞 周五凌晨4:00 翡翠台、明珠台、TVB13及now818直播

世盃開波人氣王尼馬強勢入屋！萬眾期待嘅世盃揭幕戰今晚Kick Off，焦點人物唔使問梗係尼馬，呢位森巴Icon周身代言合約，廣告自不然勁多，單係上半年嘅電視曝光率已經冠絕巴西，加埋社交網站「信徒」比揭幕戰對手克羅地亞嘅全國人口仲要多，未開波「新比利」已經先贏一仗啦！

尼馬係潮流指標，加上人氣爆晒燈，自不然成為廣告商寵兒，淨係計今年嘅贊助合約佢已經有11個，當中包括電訊商、飲料、體育用品、男士護理用品同電子產品等等，乜嘢都有份代言，尼馬堪稱「大賣家」，咁多代言合約在身，廣告自然多啦！
11個產品代言 電視亮相冠全國

根據《環球體育報》嘅調查顯示，由今年1月1日至5月25日，尼馬總共喺巴西國內電視亮相2,834次，而呢2千幾次入面係唔包括尼馬嘅賽事同體育新聞報道，電視曝光次數仲勁過巴西超模Gisele Bundchen（2,727次）同大師兄朗拿度（2,300次），成為巴西「入屋之王」。

早排體育營銷研究機構Repucom公布咗份研究報告，尼馬嘅知名度、代言合約同潮流影響力等8項數據都冠絕巴西，力壓超過500位巴西藝人、商人同運動員成為森巴最具市場價值人物，證明尼馬嘅影響力已經超越體育領域。
fb「信徒」 多過克羅地亞人口4倍

尼馬Fans真係多到你唔信，就計社交網站嘅「信徒」吖，instagram同twitter分別有538萬、1,080萬「追隨者」，facebook仲癲，足足有2,300萬「信徒」，比起今晚揭幕戰對手、克羅地亞嘅4百幾萬人口多4倍，都咪話唔得人驚！
Data King：9連勝少失波

‧森巴兵近2屆決賽周6場分組賽取得5勝1和。

‧巴西歷來踢咗97場決賽周賽事，錄得67勝15和15負，轟入210球失88球。

‧森巴兵團連續9場贏波，當中7仗零封對手。

‧巴西連續7屆世盃賽事至少殺入16強階段。