荷蘭半場頂得住

猪拉多纳

橙色警戒線 嚴防狂牛猛攻

世盃好戲連場，今晚B組首輪即上演上屆決賽翻版，由衞冕嘅西班牙火併「橙軍」荷蘭。西班牙雖捧盃捧到手軟，但無敵Tiki-Taka踢法已經畀人睇通睇透，「橙軍」自知後防太多新丁仲未「熟透」，故領隊尹戈爾打算變陣復古532陣式迎敵，一於喺中後場屯駐重兵，拉起「警戒線」嚟抵擋鬥牛士猛攻，加上西班牙慢熱成性，半場和值捧。

（無綫翡翠台、明珠台、TVB 13、now 818及840周六凌晨3時直播）
衞將輸經驗 人數搭夠

西班牙自08年起連續3項大賽奪冠，包括上屆決賽加時末段以1比0勇挫荷蘭，首度榮膺世盃冠軍，估唔到4年後雙方喺分組首戰又要正面交鋒。不過世上冇永遠不敗嘅王者，西班牙嘅無敵Tiki-Taka打法，亦逐漸被其他對手破解，尤其係面對全民皆兵、極度嚴密嘅鐵桶陣，佢哋被迫繼續「搓搓搓」，初段經常拮唔入對方心臟地帶，總係去到下半場，對方體能消耗有番咁上下先搵到罅隙，加上資料顯示上季每名「鬥牛士」平均出賽多達60場，唔攰就假，嚟到天氣炎熱嘅巴西，首仗未咁快上力亦屬人之常情。

荷蘭唔盛產出色後衞，今屆除咗華亞爾外，一班喺番荷甲搵食嘅迪維積、馬田斯恩迪、戴利白蘭特、真馬特等後生仔都唔標青，佢哋各自為「橙軍」披甲都唔夠20次，經驗略嫌淺咗啲，最弊係中場悍將史杜特文重傷退隊，冇咗呢道防線前嘅重要屏障，對「橙軍」防守打擊極大。
西班牙慢熱 難破532

荷蘭主帥尹戈爾自知質素遜對手一籌，惟有先做好防務，並以人數嚟彌補不足，因此佢打算變陣532復古陣式，由上述幾位小將合組5人防線，中場加埋「鐵腰」迪祖迪莊做掃蕩，上屆佢一腳穿心腿踩向沙比阿朗素一幕，相信唔少球迷仲對呢位硬漢印象深刻。

況且西班牙一向慢熱，近4仗面對強如意大利弱如薩爾瓦多，都係開出半場和，尤其今仗係首輪，故會踢得特別小心，初段處於膠着絕對唔奇，半場和有1.97倍，值得追多鋪。另外，西班牙非常倚重恩尼斯達組織攻勢，但「小白」體能一向麻麻，若果主帥迪保斯基臨場要變陣嘅話，相信佢好大機會被換出，不妨吼埋「小白」於特別項目嘅「被換出」。
近5次交手橙軍未輸過

今仗係上屆決賽翻版，該場決賽法定時間90分鐘內兩無紀錄要加時，結果踢至加時下半場完前場4分鐘，西班牙憑恩尼斯達一箭定江山，以1比0擊敗荷蘭捧盃，成為首支於決賽周首戰落敗而最終能夠捧盃嘅球隊。連同此仗，荷蘭對上5次於國際賽法定時間內從未輸過畀西班牙，錄得3勝2和。
荷蘭後衞 華亞爾

29歲嘅華亞爾大器晚成，佢曾於07年協助荷蘭奪得U21歐國盃冠軍，呢位英超阿士東維拉鐵衞頭槌了得，亦擅包抄執漏，喺5人防線中充當清道伕角色，係「橙軍」後防嘅定海神針。
西班牙前鋒 迪亞高哥斯達

啱啱傷愈嘅迪亞高哥斯達，身形魁梧衝得撞得，屬撼散敵軍防線製造混亂嘅典型柱躉中鋒，佢擅於搶點同捕捉入波良機，又會於前線積極逼搶，為西班牙偏柔球風加添咗硬朗元素。
法達斯維推介：半場和