英超風格變有利三獅兵團

猪拉多纳

英格蘭在香港多球迷，不外乎因為「英超情意結」。雖然近幾屆大賽英軍都係雷聲大、雨點小，唔少「三獅迷」一早對愛隊心淡，甚至經常畀其他球迷恥笑，不過今屆加入大批生力軍後就令人有所期待。

「三獅兵團」一到大賽往往問題多多，源於英超過去講求體力化，踢法直接、精彩、刺激，令本土球員技術層面上往往唔及西班牙、意大利等細膩。
史達寧拉爾拉拿值得期待

好在呢個情況近年有改善，英超愈來愈注重賽事可觀性，加上進攻足球盛行，亦令今屆世盃英格蘭大軍各方面都有改進，其中隊長謝拉特喺利物浦領隊羅渣士改造下，少咗急於進攻嘅情況，退後成為控制比賽節奏的防守中場，精湛長傳更能全面發揮。

謝拉特始終年事已高，還好陣中仲有班新世代小將，可以令「三獅兵」攻勢有更多變化，先有利物浦「神童」史達寧，進步神速嘅佢除擁有驚人速度外，現時已經能運用腳下功夫過關斬將，呢位19歲小將去季英超上陣24次，就交出9個入球5次助攻；至於獲多支英超勁旅垂青嘅拉爾拉拿，更屬英格蘭近代罕見、擁有超卓創造力，呢位進攻中場去季喺修咸頓出場37次，交出9個入球及3次助攻！若然鶴臣今屆世盃拋開保守風格、夠膽起用一班初生之犢，相信能為球迷帶來更大的驚喜，也有望令全球球迷對英格蘭改觀。