識睇西班牙梗係睇韋拿

猪拉多纳

好耐無喺波經版出現，今次小妹有幸喺世界盃期間佔一席位同大家發表吓「波論」。不過年紀大咗，提供貼士呢個動作都係交番畀啲青春少艾做好喇，咁唔畀貼士講咩好？當然仲有大把嘢講啦。
場場世盃都想睇晒

早幾日搭港鐵，小妹就目睹咗件趣事，坐我隔籬有兩個小朋友見到廣告上兩個球星，就問爸爸嗰兩個係邊個嚟。我望一望個男人，個男人笑住同小朋友講：「我唔知道。」然後我忍唔住出聲搭嘴：「左邊嗰個係查維馬天尼斯，右邊嗰個係奧斯爾。」個男人一臉尷尬笑住講：「哈哈，姐姐好叻。」其實唔係我叻，而係因為我真係好鍾意足球，特別係世界盃呢啲盛事，雖然呢幾日撞正要演出舞台劇，但我都盡量睇晒每場。

嚟到今日，主菜當然係凌晨三點嗰場西班牙對荷蘭啦！相信各位應該記得上屆決賽都係呢兩隊爭，四年前打到去加時，最後鬥牛國靠恩尼斯達入波捧走冠軍，所以今仗亮點都應該喺佢身上。不過除咗恩尼斯達外，我嘅焦點其實只有一個，就係西班牙前鋒韋拿，因為佢講明踢埋世盃後會退出國家隊，以後只可以喺美職見。咁荷蘭嗰邊有咩猛人呢？冇咗雲佬，我會推介留意洛賓或者亨特拉爾。

今屆好多人都問我究竟捧邊隊，本來為咗馬高列奧斯撐德國，點知佢最後受傷退隊，眼見韋拿退役在即，所以依家我都唔知揀西班牙定德國好，又或者兩隊都撐！
車車

第一代女球評家，現於《Road Show》做主持，日日巴士見面。