墨西哥齊心喀死人

猪拉多纳

尋晚睇完揭幕戰，今晚就輪到另外兩支A組分子打頭陣登場，由墨西哥火併喀麥隆。雖然喀麥隆國腳喺決賽周前夕同足總拆掂數，但遲咗到埗已經影響晒備戰工作，對住早有部署兼勁齊心嘅墨西哥唔樂觀，墨西哥讓平半撐上盤。（無綫翡翠台、明珠台及TVB13、now818、中央5台周六凌晨0:00直播）

擁有伊度奧、桑治同艾安安奧嘅喀麥隆，歷來喺世盃舞台真係冇乜佳作，咁耐以嚟只試過喺90年嗰屆突圍分組賽，上屆南非世盃更喺小組以3戰全敗出局，所以決賽周前夕爆出獎金問題爭執，難免令人對呢班波死晒心。
喀麥隆遲抵埗 操練Hea爆

喀麥隆球員因為決賽周獎金問題同足總擘晒面，最後足總臨急臨忙籌旗加碼，班大帝先至肯上機去巴西，比原定抵埗時間足足遲咗半日。咪睇小呢12個鐘，法國《隊報》話喀麥隆班球員到埗之後未搞掂時差，所以前晚喺卡里亞西卡嘅首課操練，只係做吓來回跑同拉筋等，世盃殺到嚟，備戰情況都仲係咁Hea，點信得過呀？
墨西哥小豌豆甘做後備

雖然話今仗對手墨西哥唔係高好多，如果唔係美國喺世盃外圍賽煞科戰搞掂巴拿馬，佢哋隨時入唔到決賽周添，但死裏逃生先至係最有效嘅警號。墨西哥之後喺附加賽以總比數9:3淘汰新西蘭搶到決賽周入場券，本月頭熱身賽仲大炒厄瓜多爾3:1，之後對住波斯尼亞同葡萄牙亦同樣只係僅輸1粒，狀態睇落唔錯。

最重要係領隊米基爾靴里拉重狀態多過名氣，查維亞靴南迪斯個朵夠響又點呀？靴里拉前晚搶閘公布今晚嘅正選陣容時，就講明將「小豌豆」擺後備，由杜斯山度士夥拍奧利比柏拉達攻堅，最難得係國家現役首席射手「小豌豆」（35球）一啲都唔介意，仲話只要國家隊贏波做後備都冇所謂，睇得出班波勁齊心。況且靴里拉開波前兩日已經公布晒正選11人，似乎對今場波胸有成竹，小讓平半信得過吖！
Data King：兩屆分組賽僅1勝

‧喀麥隆02、10年世盃決賽周6場分組賽只曾1勝。

‧20場世盃決賽周賽事，錄得4勝7和9負，入17球，失34球。

‧「非洲雄獅」近4次打入世盃決賽周，全部分組賽階段出局。

‧喀麥隆喺世盃決賽周總共出現7次球員被逐離場。
連續5屆闖16強

‧墨西哥喺近2屆決賽周6場分組賽，取得2勝2和2負成績。

‧歷來49場世盃決賽周賽事，錄得12勝13和24負，入52球，失89球。

‧連續5屆成功突破分組賽殺入16強。

‧世盃決賽周賽事中，6次有球員被逐出場。
乜都玩錦囊：兩隊防守曳捧大

墨西哥同喀麥隆都唔係世盃熱門球隊，但咁樣反而令球迷有好戲睇！皆因兩隊防線同樣唔多掂，墨西哥近5戰得1場冇失波，喀麥隆仲要近5場有3次至少失2粒，加上兩軍鋒線都各有猛將攻堅，可望開出2.6倍入球大。