英意Hea住半場和

猪拉多纳

亞馬遜雨林濕滯大作戰　

死亡D組矚目一戰英格蘭對意大利，世盃首戰就要對住同組出線勁敵，兩隊都唔想輸波，尤其上半場更加係會以穩字行先，而且喺亞馬遜熱帶雨林區作賽，天氣濕熱場地又差，斷估雙方都唔敢一開波就去得太盡，上半場多數會Hea住嚟踢，半場和捧得過！

（無綫翡翠台、明珠台、TVB 13及19、now 818及840周日早上6時直播）
鶴臣求穩大放悶蛋

由於科娜係利物浦球迷，我對曾經帶領紅軍走入地獄、現任「三獅」主帥鶴臣並不陌生，呢位「保守大師」最識踢守勢波，所以佢喺執教生涯最掂就係教中小型球會，一教大球會如紅軍同國米就失敗收場。「三獅軍團」喺呢位老帥帶領下保持穩守風格，戰術平淡，唔知英軍嘅波衫贊助商係咪為咗襯番球隊嘅悶爆踢法，所以設計出一件似足底衫嘅白色波衫呢？英軍首仗就要硬撼意大利，以鶴臣嘅作風，為免球隊輸波3分全失，一定會要求英軍先做好防務。

同樣道理，意大利今場都唔想衰開頭，至少都想有1分落袋，並喺餘下兩仗先至發力，而且防守一向係意國足球文化，雖然意軍喺主帥柏蘭迪利帶領下攻力已有改善，但戰術體系仍以守為主，再加上「藍衣軍團」向來慢熱，想玩強攻都有心無力。
兩軍角球數冠絕32強

雙方今場要去馬瑙斯嘅亞馬遜球場作賽，當地天氣又熱又濕滯，喺咁惡劣嘅環境下作戰，兩軍都唔敢拚得太盡，尤其上半場更加要勒住，以免去到下半場莫晒氣，甚至影響餘下兩場分組賽，另亦要避免受傷。英軍呢排都先後傳出有球員受傷，隊長謝拉特傷勢無大礙應可上陣，臀部不妥嘅韋碧克雖然傷愈，但略嫌狀態不足，而患膝傷嘅阿歷士張伯倫就更加唔樂觀，至於意軍今場有左閘迪施基利奧肯定無法上陣，但中場馬高華拉堤則感冒痊愈。

呢場波除咗捧半場和外，英意兩軍近8場賽事開出角球總數都冠絕32強，場均13個或以上，因此角球大亦可以一博。
MARK實佢：英格蘭前鋒　史杜列治

雖然朗尼係英軍王牌，但今季喺利物浦表現大熟大勇嘅史杜列治可能先係英格蘭最具威脅嘅武器，佢有射術有速度又識扭波，今季更戒除獨食陋習，以22個入球排英超射手榜第2，上位在望。
MARK實佢：意大利中場 派路

雖然已經35歲，但千祈咪睇小呢位用腦踢波嘅傳球大師，佢仍然係意軍中場大腦，其控制節奏功力一流，更有令人拍案叫絕嘅落葉式罰球。兩年前歐國盃英格蘭同意軍對陣嗰陣已領教過佢嘅厲害。
世盃成績 意軍秤先

意大利喺世盃的成績遠比英格蘭為佳，但在近6次碰頭中，雙方戰績接近，各贏兩次及有兩次打和。但可留意上述6仗中撇除熱身賽嘅兩次盃賽賽事，兩軍都互交白卷。另外可留意兩軍交鋒旺開細，總共開出4次。
科娜推介：半場和