象國重磅出擊玩大佢

猪拉多纳

日本防線不穩攻力可靠

世界盃分組賽C組賽事，由「大象兵團」科特迪瓦迎戰「東瀛武士」日本。科特迪瓦踢法一向進取，球隊近期熱身賽入得又失得，呢個情況相信今仗會繼續出現。日本近期喺熱身賽雖展示唔錯嘅攻力，但防線相對唔係咁穩陣，面對唔願死守嘅球隊相信有機會上演入球騷，今仗遇上近期入得又失得嘅科特迪瓦，入球相信唔會少，大盤有2.45倍非常抵買，值得支持。

（無綫翡翠台、明珠台、TVB13、TVB19、now 818及840周日上午9時開賽）

科特迪瓦上兩屆世界盃分組賽都幾唔好彩，06年同荷蘭及阿根廷同組，10年就遇上巴西同葡萄牙，縱然兩屆賽事表現出色，亦只能無奈喺分組賽提早出局。不過，科特迪瓦今季嘅同組對手冇前兩屆咁惡，出線機會相對提高。科特迪瓦今屆繼續倚重杜奧巴、耶耶托尼、高路托尼及沙洛文卡勞等富經驗球員，但耶耶托尼因大腿受傷未知能否上陣，對中後場影響甚大。幸好科特迪瓦前線火力仍舊保持到水準，對上兩仗熱身賽雖有失波但亦能取得入球，今仗面對日本相信會繼續呢個情況。
「魔獸」復仇博埋佢「入球」

日本對今屆世界盃非常重視，早早已去到美國集訓備戰，可惜隊長長谷部誠受傷患困擾，雖然佢話已準備好上陣，但以主帥沙哲朗尼嘅穩陣作風，相信唔會冒險用佢住。日本喺之前熱身賽缺少呢位中場大將，令防守出現問題，幸好前線火力驚人，香川真司與本田圭佑成功發揮《足球小將》嘅打不死精神，兩場熱身賽同樣都喺落後嘅情況下反勝對手。日本近期面對某啲一心死守嘅球隊都顯得老鼠拉龜，反而面對踢法進取嘅球隊會較容易入波同失波，科特迪瓦嘅踢法一向進取，相信日本今仗有望喺對手身上取得入球，但要保住清白之身亦非易事，今仗入波相信唔會少，一於捧大盤。

值得一提，「魔獸」杜奧巴2010年世界盃舉行前夕喺同日本進行友賽時，因被侵犯受傷導致緣盡世界盃，今仗可以話係仇人見面分外眼紅，「魔獸」自然會加多兩錢肉緊爭取入球，首先發生喺杜奧巴嘅特別項目可以選擇有2.8倍嘅「入球」。
3次對賽全開細

科特迪瓦與日本近廿多年來僅對賽3場咁大把，成績勝和負各一，可謂不相上下，大細盤方面過去3場都開細，入球在兩球或以下，因此大家刨波可由此入手。
MARK實佢：科特迪瓦前鋒 謝雲奴

呢位喺阿仙奴被喻為唔識入波嘅球員，今季追隨恩師魯迪加西亞，以800萬歐元轉投意甲羅馬後表現脫胎換骨，上陣37場射入12球，帶領羅馬取得聯賽亞軍及下屆歐聯參賽資格，當「魔獸」杜奧巴被對手盯實時，就係謝雲奴嘅搵食機會。
MARK實佢：日本前鋒 柿谷曜一朗

呢位踢緊大阪櫻花嘅前鋒今季表現雖未算突出，但喺前線仍有一定作用，就連國家隊主帥沙哲朗尼亦不時向意甲球壇推銷呢位射手，難怪「紫百合」費倫天拿對佢極度關注，今仗對科特迪瓦將會係柿谷嘅「考牌戰」，自然搏盡爭取入球。
美斯謙推介：大