哥倫比亞盡情開火

猪拉多纳

希臘靠老將唔頂得幾耐

今晚頭場上演C組首輪分組賽，哥倫比亞於貝洛奧里藏特鬥希臘。哥倫比亞雖然缺少王牌射手法卡奧，不過其他鋒將包括積臣馬天尼斯、卡路士巴卡、阿祖安拉莫斯於剛過去球季都有上佳演出，攻力依然強大。以守起家嘅希臘多年來踢法一成不變，面對有半個主場之利嘅哥軍難有勝望，主勝可捧。

（無綫翡翠台、明珠台、TVB 13及now 818周日凌晨零時直播）

C組被視為今屆決賽周實力最平均嘅小組，哥倫比亞係此組唯一一支排喺世界前十名嘅球隊，加上來自南美洲，有天時、地利之助，可略為睇高半線。哥倫比亞以往曾四次參與決賽周，成績最好係90年一屆打入十六強，外界認為今屆實力足以和當屆擁有「金毛獅王」華達拉馬、「狂人」希基達等名將嘅陣容睇齊。

哥倫比亞前線有効力波圖嘅「法卡奧二世」積臣馬天尼斯、上季幫西維爾贏得歐霸盃冠軍嘅卡路士巴卡，以及來季將加盟多蒙特嘅哈化柏林前鋒阿祖安拉莫斯，中場則有技術型球員占士洛迪古斯做派牌，攻力甚強。王牌前鋒法卡奧雖然未能趕及傷愈，不過呢名射手自年初重創以來，一直欠缺正式比賽及操練，勉強選佢入隊未必係好事。
希臘食老本難突圍

希臘由十年前爆冷贏得歐國盃冠軍開始，一直沿用「穩守突擊」獨步單方，可惜佢哋近年青黃不接，中後場仍要依靠加素蘭尼斯、沙賓基迪基、雲查等年過三十老將，攻守效率難跟全盛時期相比。前線稍具威脅嘅美度古又受傷患困擾，單靠森馬拉斯實難構成太大威脅。正所謂「久守必失」，希臘只踢守勢波好難突圍。球隊於今屆歐洲區外圍賽只和波斯尼亞單打獨鬥，附加賽又抽中對今非昔比嘅二流球隊羅馬尼亞，能夠闖入決賽周某程度上係好運；今場捧哥倫比亞主W。
哥倫比亞助攻王 占士洛迪古斯

被譽為「金毛獅王」華達拉馬後最具創造天分嘅中場球員，去年加盟摩納哥即當選球會最佳球員，同時亦係上季法甲助攻王。
希臘94世盃「三零」出局

雙方唯一交手係於94年世盃前嘅熱身賽，當時擁有「金毛獅王」華特拉馬同艾斯派拿等球星嘅哥倫比亞，憑住加維里亞及連干各建一功，喺中立場以2比0輕取希臘，可惜當年備受睇好嘅哥倫比亞爆冷於世盃分組賽出局，希臘喺當屆更成為「三零部隊」。
基格拿手緊少派牌

國籍：美國　　

年齡：39

曾執法大賽：11世青盃、12奧運、13世冠盃

簡介：基格拿正職是中學數學老師，09年曾獲得數學及科學教學大獎，數口好精。現時主要於美職執法，同時會於中北美洲大賽出現，亦是2012年奧運16個球證團隊成員之一。據他以往於奧運表現來看，其在比賽期間並不經常派牌，執法尺度都未算太嚴。

執法場數：39

黃牌數：148

紅牌數：12

判12碼：10

平均黃牌：3.79

平均紅牌數：0.31

平均判12碼次數：0.26
波童推介：哥倫比亞主勝