「80歲」神猴貼今場1:1

猪拉多纳

大膽預測藍武士入4強

日本今晚會打和科特迪瓦1:1，最後更加躋身世盃4強！

呢個預測唔係球評家畀嘅，係嚟自「日光猿兵團」嘅英太郎，呢位28歲嘅仁兄，其實係隻猴子，年紀等同人類嘅80歲。正所謂人老精鬼老靈，英太郎除咗早年參與唔少電視同公開活動演出，仲接拍過南韓、台灣嘅廣告之外，近年又開始做埋戰果推介，舊年底就幫日本四大賽馬賽事之一嘅有馬紀念賽做過分析。到底結果準唔準？唔……如果掂咗嘅，就唔使幾十歲都要拋頭露面出嚟捱啦。
估埋岡崎慎司入波

由栃木縣日光市「猿之學校」培養出嚟嘅英太郎，今次真係瞓身演出，除咗估賽果，連入球球員都推介埋。英太郎用揀數字牌，相片嘅方法提供自己嘅心水。第一場對科特迪瓦，佢揀咗1:1，岡崎慎司係建功者；第二場對希臘，日本贏4:3，小將柿谷曜一朗主導賽事；第三場仲勁，日本數咗哥倫比亞4:0，呢場輪到本田圭佑發威。英太郎仲預計「藍武士」會再過兩關，打到入4強至畢業添。

最妙係英太郎望咗長友佑都張相好耐，應該係覺得「佢今屆一定掂」，日本傳媒仲形容英太郎似乎對長友有一份「莫名嘅親切感」喎。莫非長友似……