美斯首騷全世界（目及）實

猪拉多纳

一提起阿根廷，英迷應該大嗌Dislike！我印象中好深刻98年世界盃16強施蒙尼同碧咸事件，因為當年係我第一次睇波。不過，見到今時今日施蒙尼帶馬體會帶到發晒光，都不得不真心佩服呢位阿根廷狂人。

雖則對施蒙尼有所改觀，但我始終對阿根廷國家隊感覺麻麻哋。不過論球技及名氣，睇阿根廷高一線係常識吧！唔使我多講，有「阿根廷張家輝」之稱嘅球王美斯，相信係全世界球迷以至敵對球員嘅焦點。對手必定會場場都Mark實佢，咪講話射波，就連攞波機會都未必多，惟有將期望擺喺其他球員身上，例如迪馬利亞、馬斯真蘭奴、阿古路等球星。

雖然阿根廷曾經攞過兩次世界盃冠軍，但近兩屆都係去到八強止步。不過今年佢哋好彩抽到支好籤，同組嘅球隊都只係波斯尼亞、伊朗同尼日利亞，所以喺呢組攞首名出線應該問題不大。
新丁波斯尼亞預交學費

阿根廷分組賽首場對住波斯尼亞，波斯尼亞係92年立國之後首次殺入世界盃決賽周，要數較為多人認識嘅球員應該都係効力英超球會曼城嘅前鋒迪斯高，同埋門將比高域，不過波斯尼亞始終係世盃新丁，對住老大哥阿根廷，加上兩隊級數都唔同，所以唔使我講，大家都知點揀啦。