德國食住葡萄牙W得

猪拉多纳

大賽專家 首戰例有貨交

世盃G組首輪賽事今晚上演，爭霸第3熱門「大賽專家」德國喺薩爾瓦多新水源體育場出戰葡萄牙，德軍領隊勒夫賽前聲稱球隊從未試過有咁好準備去應付大賽，球隊對爭盃充滿飢渴，可謂萬事俱備，面對幾名主力有傷患陰霾嘅葡萄牙，以其超班實力足以打響頭炮，推介1.9倍主勝。

（無綫翡翠台及明珠台、TVB13及19、now818及840周二凌晨零時直播）
高路斯伺機破紀錄

德軍今次出征巴西相對低調，經過馬高列奧斯於最後熱身賽受重創退隊後，球隊奪標賠率進一步回軟，喺足智彩由開飛4.5倍回到6倍，次熱位置亦被阿根廷搶去，不過領隊勒夫賽前信心十足，聲稱德國今次有歷來最好準備，以最年輕陣容加上新陣式，絕對有爭霸決心，經過反覆演練後，勒夫今仗會排出433陣式，精粹係將隊長拿姆擺喺中場做自由人，除負責策動由守轉攻外，今仗亦會針對葡軍王牌C朗拿度，為右閘謝路美保定做第一道屏障。球隊影子箭頭奧斯爾有更大活動範圍，兩翼湯馬士梅拿同普多斯基亦會進一步推前，希望用控球同跑動折磨葡軍防線，等到葡軍兵疲嘅時候，喺適當時候再調入殺手高路斯搏殺，情況同科特迪瓦擊殺日本相似。

今仗係德國隊第18次踢決賽周，呢支大賽專家向來喺決賽周首戰都有好表現，過去17次首戰取得12勝4和僅1敗成績，至於高路斯雖先任後備，但呢位36歲前鋒不但喺世盃決賽周累積咗14個入球，而且過去3屆決賽周首戰場場有波入，3場加埋入咗6球，今晚以後備殺手上陣，隨時可以追和甚至超越朗拿度保持嘅決賽周15球個入球紀錄。

葡萄牙整體實力喺歐洲只屬一線尾，同德國有段距離，今場形勢依然被動。何況陣中3名皇馬兵基斯坦奴朗拿度、比比同法比奧干查奧都受傷患困擾多時，雖然今晚仍可上陣，但能否交出最佳水準成疑，尤其金球獎得主C朗每次喺大賽面對德國都踢唔出最佳水準，以目前狀態，更難靠佢單天保至尊。
皇馬兵瓣瓣唔老利

仲有一點值得留意就係西甲球會皇家馬德里嘅運氣似乎已經喺歐聯決賽用盡，陣中球員喺今屆決賽周頭頭碰着黑，卡斯拿斯、沙治奧拉莫斯同沙比阿朗素一班鬥牛士固然慘遭荷蘭血洗，莫迪歷喺克羅地亞對巴西一役輸波兼受傷，就算巴西嘅馬些路贏波都要擺烏龍，認真唔老利！雖然德軍都有基迪拉効力皇馬，但葡軍3大主力都係皇馬人，而且全部唔弗，今晚隨時出事。
MARK實佢：德國中場 拿姆

德國隊長拿姆早已被譽為世界最佳二閘之一，今屆德軍多名閘位球員受傷，領隊勒夫仍然要將佢推上中場，皆因認為以佢嘅級數應該喺更重要位置帶動全隊，今屆隨時再升呢！
MARK實佢： 葡萄牙中場 摩天奴

咪以為葡萄牙係C朗一人球隊，向來以刺探敵情聞名嘅德軍分析師施真泰拿就講明，効力法甲摩納哥嘅摩天奴至係葡軍中場大腦，今晚一定要好好招呼佢，截斷佢對C朗嘅供應。
近3次大賽對壘德軍贏晒

德、葡兩軍歷來曾經9度於大賽交鋒，德國成績佔壓倒性優勢，錄得4勝3和2負。而自2000年後兩軍3次在大賽決賽周碰頭，包括06世盃、08及12歐國盃，德國獲得全勝，頗有剋星味道。
馬斯克首吹世盃經驗輸蝕

國籍：塞爾維亞

年齡：41

曾執法大賽：歐霸盃

簡介：馬斯克是今屆資歷比較淺嘅其中一位球證，佢喺09年先至成為國際足協球證，大部分時間執法塞爾維亞國內賽事，亦有份主吹今屆世界盃外圍賽，另亦有參與歐霸盃比賽。馬斯克大賽經驗較輸蝕，唔知會唔會因為怯場而隨製造一啲話題性嘅「經典判決」？大家拭目以待。

執法場數：61

黃牌數：272

紅牌數：16

判12碼：17

平均黃牌：4.46

平均紅牌數：0.26

平均判12碼次數：0.28
蘇斯黑柴推介：德國勝