巴西喪攻墨西哥

猪拉多纳

世界盃分組賽話咁快就展開第2輪賽事，A組主辦國巴西迎戰墨西哥，兩隊都喺首輪旗開得勝，今仗再贏嘅一隊幾好大機會成為A組首名出線。而巴西主場出擊，對小組首名志在必得，而王牌前鋒尼馬如果今仗有波入，就會成為近44年首位於頭兩仗世盃入到3球嘅巴西球員，兼超越細哨嘅國際賽入波數字，奠定森巴新世代球王地位，必定全力數胡。墨西哥雙箭頭杜斯山度士、奧利比柏拉達堪稱「森巴殺手」，屢破對手大門，有力同巴西鬥攻，捧入球大。

（無綫翡翠台及明珠台、TVB13及19、now818及840周三凌晨3時直播）
尼馬要破細哨紀錄

尼馬上仗對克羅地亞演出Sharp醒，特別係妙射網仔扳平一球，充分展示其頂級射術。呢位22歲前鋒為巴西上陣50次已累積33個入球，只要入多1球，就超越朗拿甸奴，並追平李華度喺國家隊嘅入波數字，相當犀利。事實上，巴西以尼馬為進攻核心，佢踢國際賽入球機會遠比喺巴塞多，更何況來到創造紀錄時刻，應會更搏命爭取破門，隊友們亦會識做，助攻畀佢完成目標。

「森巴兵團」唯一不利消息係前鋒侯克受傷，好可能會缺陣，預料領隊史高拉利會派拉美利斯填補佢嘅正選位置，呢位車路士中場雖屬工兵型，但後上埋門亦好有威脅，上仗後備上陣只係3分鐘，就貢獻咗1次助攻。另一位「車手」奧斯卡杜斯山度士狀態大勇，上仗助攻兼有入波，即使侯克倦勤，相信亦無損森巴兵團嘅火力。巴西身為東道主，一為盡快確保出線權，二為化解民間怨氣，三為報兩年前奧運金牌戰敗辱，定必會喪攻對手，務求攞到最豐碩戰果。
少斬中波玩角球細

墨西哥上仗如非畀球證兩次錯判越位，肯定唔只贏喀麥隆1粒，一對箭頭杜斯山度士、奧利比柏拉達極具侵略性。兩人更有「森巴殺手」之稱，杜斯山度士兩年前熱身賽作客巴西，攻入1球再妙傳查維亞靴南迪斯建功，以2比0擊敗巴西。另外喺倫敦奧運決賽，奧利比柏拉達梅開二度，助墨西哥2比1贏巴西，雙劍合璧出擊，森巴兵雖勝算較高，但其防線料難保清白之身。

事實上，兩隊近10次交鋒，各贏4次及2次打和，足見墨西哥實力同巴西唔係想像中差得咁遠，有權同巴西駁火，咁仲唔係開大？另外，兩隊習慣控球在腳，以中路小組入滲為主，較少兩邊斬中，估計角球會偏少，角球大細中位數10.5，可以考慮玩細。
Mic少推介入球大