阿根廷調節好Hea住贏

猪拉多纳

狀態逐步提升有利爭標

要喺世界盃揚威就要踢足7場波，點樣調整狀態由分組賽第一場開始逐步提升，對領隊嚟講係好考功夫，唔可以一早操到弗晒，又唔能夠冇厘火氣。尋日朝早同Peter講嗰場阿根廷煲魚生粥僅贏波斯尼亞，就示範點樣唔嘥力又拎3分。

阿根廷編喺F組，冇人會懷疑佢哋嘅首名出線資格，客觀形勢有利，領隊沙貝拉自然心中有數睇定臨場形勢部署。嚴格嚟講，阿根廷呢場真正出力只有十幾分鐘，就係美斯入波之後嗰段時間，其餘時間可以話完全hea踢。剩睇數據嘅話，贏波一方應該係波斯尼亞，但踢波唔同計數，最重要質量，所以輸形勢贏波經常發生。
畀對手攻 測試防線

沙貝拉吩咐球員就住踢千祈咪受傷，盡可能畀對手攻多啲，乘機練下防線承受被攻嘅壓力，佢將呢場世界盃分組賽當正熱身賽，真係羨慕死隔離，只不過對真金白銀買波飛入場嘅球迷，可能會呻笨睇唔到真正嘅阿根廷足球。

其實唔單止踢波要識得留放，我哋講波佬連續一個月捱更抵夜，更唔可以一早就有幾盡去幾盡放乾自己，要適當調整生活習慣同生理時鐘。又係時候爆吓Peter料，佢將自己休息時間話畀各界友好聽，果段時間會熄電話搵唔到佢，瞓夠起身就飲齋啡水，咁就可以神奇、頂級、超卓咁講波！