荷蘭變陣狂炸澳洲

猪拉多纳

劏完狂牛捉袋鼠

B組次輪賽事澳洲於阿萊格里港出戰荷蘭。荷蘭上仗清風送爽地以5比1反勝衞冕嘅西班牙，令人刮目相看，前線嘅尹佩斯同洛賓踢到着晒火，主帥尹戈爾今仗會用番433陣式，火力全開實攻到「袋鼠兵團」有氣冇碇抖，直取讓球客勝。

（無綫翡翠台及明珠台、TVB 13及19、now 818及840周四凌晨零時直播）

B組首輪嘅上屆決賽翻版戰，荷蘭於落後一球以5比1擊潰「狂牛」 西班牙，報番一箭之仇，佢哋改用532陣式，頻頻打反擊收到奇效，尹佩斯與洛賓各入兩粒on fire，弗到漏油，史奈達亦重拾佳態，最令人驚喜係後防迪維積、馬田斯恩迪、戴利白蘭特等幾名生牯仔，前者有入波，後者仲造出兩次靚助攻，非常sharp醒，絕對係初生之犢不畏虎。
澳洲防線殘上加殘

相反，澳洲依家處於青黃不接，雖然上仗演出落力，但最終仍以1比3不敵智利，成場波被對方控制戰局，最弊係連一向穩健嘅防守都蕩然無存，兩名中堅史柏拉洛域同阿歷斯韋堅遜錯漏百出，今仗仲有主力右後衞法蘭積因為右腳拉傷，提前告別世盃，被迫由賴恩麥高雲代替佢，但呢位効力中超ＦＣ山東嘅高大中堅轉身極慢，要佢客串右閘盞衰多兩錢重。
博尹佩斯入3球或以上

況且荷蘭主帥尹戈爾因時制宜，與上仗對西班牙主守格局唔同，今仗打算復用傳統嘅433陣式，擺明車馬開正佢哋主攻嗰瓣，淨係洛賓一個喺邊線都玩謝賴恩麥高雲喇，加埋謝明蘭斯幫手，火力更盛，「橙軍」最叻踢順風波，中鋒尹佩斯大把數胡機會，澳洲今仗聽做炮灰，斯維建議直取讓球主勝。特別項目方面，荷蘭隊長尹佩斯腳風順到冇朋友，面對澳洲班老弱殘兵，仲唔趁機入多幾粒博做神射手咩，不妨捧佢入3球或以上。
荷蘭後衞 戴利白蘭特

呢位助教兼名宿白蘭特嘅乖仔，能踢左閘及防中，雖然被認為守強攻弱，但上仗大炒西班牙奉獻兩記助攻，包括尹佩斯神級插水式頭槌扳平嗰球，正係來自戴利白蘭特一腳逾50米嘅精確長傳，不容小覷。
澳洲前鋒 卡希爾

34歲嘅卡希爾依然寶刀未老，雖然身形唔算高但彈跳力強，上仗攝到靚位搶點頭槌破網，唔單止係佢第四個世盃士哥，亦令佢成為第二位連續三屆世盃均有建功嘅亞洲球員，「袋鼠兵團」要爭取入波靠晒佢。
法達斯維推介：荷蘭讓球客勝