巴西爭標一堆攔路虎

猪拉多纳

德意對辦 阿根廷線路好

今屆東道主巴西首仗順利以3比1擊敗克羅地亞，睇埋同屬A組嘅對手墨西哥及喀麥隆實力麻麻，相信佢哋首名出線機會高唱入雲。不過，巴西若然以首名衝出分組賽，將會喺上線面對B組次名，無論係弗到爆嘅荷蘭、衞冕嘅西班牙定係南美洲老對手智利，絕對唔易應付，如果再過一關，8強亦可能撞正來自「死亡D組」嘅對手，就算有幸殺入4強，極大機會碰上狀態大勇嘅德國，「森巴兵團」嘅爭標之路可謂困難重重。
日耳曼兵團瓣數多

除咗巴西之外，其餘已亮相嘅勁旅如意大利及德國演出都搶眼，其中後者雖然失去因傷退隊嘅馬高列奧斯，但佢哋進攻瓣數極多，主帥勒夫既可使用無鋒陣，必要時可讓老將高路斯打單箭頭攻堅，該隊後防派出四名高大中堅，儘管用謝路美保定及賀維迪斯打兩閘，好似唔夠靈活快速，但連同中路嘅梅迪薩卡及曉姆斯，無論喺防守定後上助攻嘅高空波都有優勢，對葡萄牙時曉姆斯嘅頭槌入波有辦你睇。

至於有美斯助陣嘅南美勁旅阿根廷，喺首仗險勝波斯尼亞表現唔太標青，不過喺世盃呢類一個月嘅大賽，最緊要係贏波，初段示人以弱鋒芒未露並非壞事，加上佢哋若以F組首名出線，處於下線所遇嘅可能只係瑞士、比利時等相對較弱嘅對手，條路比上線嘅死敵巴西更易走。