狂牛知衰搏命撞散智利

猪拉多纳

西班牙首戰畀荷蘭大炒，佢哋今晚喺B組分組賽第2戰面對首場贏波嘅智利，真係不容再失。正所謂：「知恥近乎勇」，首場大敗嘅慘痛經歷，相信令「狂牛兵團」明白自己已經唔係天下無敵嘅球隊，肯定會踢得更落力。況且佢哋要追番得失球嘅差距，一定要入多幾球。「狂牛兵團」今場讓半一，絕對撐得過！

（無綫翡翠台、明珠台及TVB13、now818台、中央5台周四凌晨3:00直播）

西班牙首戰大出洋相，畀「橙衣兵團」大炒1:5，全世界都話「狂牛王朝」已經沒落。冇錯，佢哋上場攻勢真係冇咩威力，不過用一場嘅表現，就話「狂牛兵團」已經唔掂，實在太過武斷。西班牙依家得失球差係-4，呢兩場唔輸得之餘，仲要不停入波，追番得失球嘅劣勢，壓力雖然大，但一班球星個個經驗老到、見慣風浪，今次危機反而可以見真章。
迪哥唔多夾 費托打正選

我認為西班牙領隊迪保斯基，亦會喺呢場作一定調整，踢法一定要更進取。前鋒迪亞高哥斯達明顯同班波唔夾，有時都唔知自己應該點踢，所以就算費托已經「回晒塘」，但佢始終都同其他球員夾慣夾熟，應該會以正選上陣。而門神卡斯拿斯首仗失咗5球，仲自責話可以退居後備，但副選之一嘅迪基亞練波受傷缺陣，相信「聖卡斯」會Keep到正選位置。
智利防線唔穩陣

另邊廂，智利首戰對澳洲贏得輕鬆，當然想乘勝追擊，贏埋呢場提早出線。不過佢哋實力同荷蘭差兩個級數，同西班牙都有一定距離，而且條後防線唔算穩陣，要頂住發力狂攻嘅「狂牛兵團」一啲都唔易。既然西班牙已經「知衰」，今場一定踢出應有水準，我信佢哋會及時反彈，撐硬呢個上盤。
西班牙8強常客

西班牙近2屆世盃決賽周6場分組賽，錄得5勝1負成績。

踢過51場決賽周賽事，錄23勝12和16負，總共攻入82球，失62球。

連續3屆世盃決賽周至少入8強。

歷屆世盃決賽周只拎過1面紅牌。
智利分組賽勝率低

智利喺98年、10年世盃決賽周6場分組賽，錄得2勝3和1負，勝率偏低。

踢30場決賽周賽事，錄得10勝6和14負，總共攻入37球，失46球。

對上2次打入決賽周，同樣喺16強止步。

今屆世盃外圍賽南美洲區16戰攻入29球，只係少過榜首阿根廷。
鬥牛豆腐防線好大鑊

西班牙依家變咗攻唔強守唔穩嘅球隊，今場條「豆腐渣」防線對住智利，認真危危乎。尤其是智利前鋒A山咁快，真係一球直線就可以送佢一程。今場入位數2.5球，1.68倍入球大絕對抵玩。