波斯尼亞 哥倫比亞勇字行頭夠Surprise

猪拉多纳

世盃第一輪分組賽啱啱踢完，32隊國家隊全部出過場，唔知有冇邊隊又或者邊場波畀到大家深刻印象嘅呢？對小弟嚟講，唔係西班牙畀荷蘭大炒嗰場，亦唔係比比又再發癲累死葡萄牙，反而係睇到幾支賽前被人睇唔起嘅國家隊，例如哥倫比亞同波斯尼亞等等嘅鬥心同拚勁，真係值得欣賞。

勢估唔到哥倫比亞喺C組一出場個氣勢咁勁！或者因為佢哋位處巴西隔籬近近哋，班「哥粉」可以大舉入侵「十卜」啦！喺幾萬名球迷瘋狂打氣之下，哥倫比亞真係有驚喜表現，行軍快速同極有效率嘅突擊，令人眼前一亮。當然佢哋亦得到應有嘅回報，係咁意就將出名強悍嘅希臘防線折磨到體無完膚。另一隊南美波智利又係用極具機動性嘅攻勢突圍，主將阿歷斯山齊士固然硬淨，伊度亞度華加斯等等攻擊手，亦成日威脅到對手。
唔怕硬撼強敵 有本錢突破分組

至於首次出戰世盃決賽周嘅波斯尼亞，唔知係咪唔少球員都經歷過戰火洗禮，成班人真係乜都冇有怕，盡顯勇士本色！睇佢哋早幾日對住阿根廷，冇怯場之餘，仲可以令呢隊南美洲區外圍賽一哥陷於苦戰，可惜最終都係輸咗畀美斯！波斯尼亞第二場分組賽將會對住實力同鬥心都差啲啲嘅尼日利亞，有望全面發揮水準，攞到歷史勝仗。

其實智利、哥倫比亞同波斯尼亞嘅共通點，除咗係同樣擅打既機動性又具效率嘅高速突擊之外，就係佢哋唔怕硬碰強敵，而且仲夠晒氣勢！睇番佢哋同組對手冇一隊有呢啲特質，相信憑住鬥志同有效嘅戰術，絕對有能力打入16強或者走得更遠！