對得足球多都想抖下氣

猪拉多纳

最近喺網上睇到一段名為「一生只想尋找一個陪你睇波的女人」嘅短片，身邊好多朋友亦好渴望可以搵到一個咁嘅另一半，不過作為一個波經工作者，每日返工時間已經需要對住有關足球嘅工作，下班後實在有必要需要空間抖抖氣。波童情願喺屋企同另一半講吓娛樂圈八卦事，亦好過繼續研究曼聯醒定利物浦叻。或者波童比較鍾意同三五知己、甚至夜闌人靜時自己一個人睇波，所以認為「一個唔會阻止你睇波的女人」已經好足夠。
巴西和波其實係好事

經過前晚比賽，大家已經睇晒今屆32路大軍嘅表現，德國及荷蘭無疑最搶鏡，不過根據過往經驗，決賽周太快上力未必係好事。主辦國巴西第二輪分組賽打和墨西哥，畀領隊史高拉利知道仲有乜嘢地方要改善，而且連續兩場分組賽都遇上唔同程度嘅阻滯，亦令球員唔會畀勝利充昏頭腦，有利應付逆境波。

另一支表現令波童留下深刻印象嘅係意大利，意大利能夠喺死亡D組打響頭炮完全贏在賽前部署同經驗，雖然嗰場比賽意大利去到尾段畀人感覺係「捱」番終點，不過94年意大利何嘗唔係喺炎熱嘅天氣下，「捱吓推吓」咁一直殺入決賽，如果意大利今屆可以喺對方地頭擊敗巴西、追平對手五奪世盃嘅偉績，咁就真係乜仇都報晒！