英格蘭慣常令擁躉失望

猪拉多纳

相信捧咗英格蘭多年嘅球迷，唔多唔少都會有心酸嘅感覺。我都好明白大家嘅心情，因為英格蘭係我第一隊捧嘅國家隊，但小妹屬於理智型，老實講，今時今日嘅英格蘭真係失色咗好多。

2010年分組賽三場不敗又如何？一到16強，對住真正強隊德國就被大炒4比1。到咗今屆首仗對住意大利，大家都睇到唉聲嘆氣，半場和波叫收貨，但下半場就畀巴洛迪利KO了，最搞笑係踢到中段已經好多人抽筋，真係唔知佢哋點備戰，試問大家仲可以對「三獅軍團」有咩期望呢？我只希望赫特今仗對住烏拉圭，盡量守住個龍門，就算英格蘭入唔到波，都唔好失得咁多球。

至於烏拉圭方面，上場對哥斯達黎加半場憑卡雲尼入波領先好正路，點知下半場畀哥斯達黎加連入三球，臨完場前仲有彭利拿攞紅牌，今場對英格蘭我都唔知捧邊隊好。
烏英唔知點 撐日本好過

因此，今日我會將重心擺喺6點鐘日本對希臘呢場。因為論人腳日本真係佔優啲，除咗有士哥手本田圭佑外，仲有香川真司、岡崎慎司同內田篤人在陣，上場又汲取咗兩分鐘內失兩球導致輸波嘅教訓，今場對住希臘，相信日本一定可以贏到，一洗上場烏氣兼打開勝之門。