鬪魂！強攻希臘！藍武士不勝無歸！

猪拉多纳

今屆世界盃決賽周32強當中，我就覺得「藍武士」件波衫最靚喇！藍色撞螢光粉紅色，又Sharp又醒神！雖然日本隊首戰以1:2不敵科特迪瓦，但我深信佢哋嘅信心唔會就咁就動搖，今場面對首仗同樣輸波嘅希臘，肯定發揮「鬪魂」開W，氹番班東瀛「粉絲」，一於直取日本2.1倍主W！（TVB13及now818台、中央5台周五早上6:00直播）
本田：我哋會振作！

日本第一場畀科特迪瓦反勝，入波功臣本田圭佑賽後雖然表示失望，但就好有信心「藍武士」可以重新振作，堅持進攻信念喺小組出線，向殺入8強嘅目標進發！Honda哥其實具備晒我心目中男神嘅條件，既靚仔專一，又好波，上場佢開賽16分鐘就入咗粒世界波，入嗰刻我直情成個彈起兼嗌咗出嚟，呢球仲係日本隊史上最快嘅世盃入球，堅值得紀念！

可惜佢拍檔香川真司暫時未嚟料，上場零射門，唔知係咪同去季喺曼聯坐到個人慌晒有關呢？點都好，我相信以香川嘅心理質素，好快就可以由谷底反彈，再創高峰嘅！

查實日本今屆嘅人腳，亦係近年最好最平均，「藍武士」除咗有上述兩大中場核心，佢哋嘅一對閘長友佑都及內田篤人，亦已經喺歐洲聯賽獨當一面，咪忘記前線仲有德甲孖寶岡崎慎司同清武弘嗣壓陣，班手足實力去到邊，金牌領隊沙哲朗尼當然心裏有數啦，今戰會作出針對性嘅部署，搵老將遠藤保仁出嚟控制中場，有望改善首戰攻勢過於迂迴嘅毛病，增加射門，今場面對老化問題嚴重嘅希臘，應該可以順利開W。
希臘森馬拉斯 名大於實

事關希臘除咗喺04歐國盃創出奇迹，其餘大賽嘅戰績真係不敢恭維，94世盃首戰慘吞阿根廷4蛋，上屆南非世盃第一場又輸畀南韓，到今屆第一擊對哥倫比亞亦輸0:3，係黑仔定堅唔夠班呢？其實佢哋上場對哥倫比亞都有些微攻勢，可惜威脅欠奉，把握力好唔掂，29歲嘅前鋒森馬拉斯，更畀我名大於實嘅感覺，今戰除非班老將「返老還童」，否則好大機會輸多鋪執包袱咯。
Data King：希臘分組賽例出局

‧希臘喺1994、2010年世盃決賽周6場分組賽，僅取得1勝5負成績，只入2球，失15球。

‧曾2次打入決賽周，全部分組賽止步。

‧喺今屆世盃歐洲區外圍賽只失4球，僅次失3粒嘅西班牙，成為歐洲「防守王」2哥。
乜都玩錦囊：日本搏命搶半W

日本同希臘首戰都係輸波而回，為出線今戰一定當決賽咁踢。雖然日本鋒力比唔上希臘首仗嘅對手哥倫比亞，但都絕對唔可以睇小，尤其係佢哋自知體力捱唔足90分鐘，一定想上半場就K.O.希臘，日本個2.8倍嘅半場主W抵博。
Data King：日本係亞洲士哥王

‧日本曾4次打入世界盃決賽周，最佳成績為16強。

‧踢過15場決賽周賽事，錄得4勝3和8負，總共攻入52球，失59球。

‧近2屆世盃決賽周6場分組賽，錄得2勝1和3負成績。

‧今屆世盃外圍賽亞洲區B組入16球，係小組之冠。

‧兩軍曾於05年洲際盃交手，日本當時贏1:0。
決賽周數據

日本 Vs 希臘

1 場數 1

1 入球 0

2 失球 3

0 贏 0

0 和 0

1 輸 1